Siłaviki pachvalilisia, što ŭzłamali telehram-akaŭnt Kabančuka, i apublikavali dokazy
abnoŭlena
U čaćvier telehram-kanał, źviazany ź siłavikami, zajaviŭ pra ŭzłom telehram-akaŭnta pradstaŭnika Abjadnanaha pierachodnaha kabinieta, byłoha namieśnika kamandzira pałka Kalinoŭskaha Vadzima Kabančuka. U kamientary «Lusterku» sam jon abvierh hetuju infarmacyju i zajaviŭ pra niemahčymaść uzłomu jaho akaŭnta ŭ Telegram. Ale na hetym sprava nie skončyłasia.
09.01.2025 / 13:30
Vyjava ź infarmacyjaj pra telehram-akaŭnt Vadzima Kabančuka, apublikavanaja ŭ kanale siłavikoŭ, 9 studzienia 2025 hoda. Fota: nabližany da siłavikoŭ telehram-kanał
— Uzłomu nie było, z maim akaŭntam u Telegram usio dobra, — zajaviŭ Vadzim Kabančuk «Lusterku». — U mianie ŭklučanaja dvuchfaktarnaja vieryfikacyja, jakaja robić uzłom niemahčymym.
Sa słoŭ Kabančuka, skrynšoty i fota dakumientaŭ, jakija źjavilisia ŭ kanale siłavikoŭ, imavierna, byli ŭziatyja imi ź pierapisak inšych karystalnikaŭ Telegram abo inšych miesiendžaraŭ.
Kali kamientar Kabančuka byŭ apublikavany, hubazikaŭcy abvierhli jaho słovy, apublikavaŭšy skrynšot pierapiski Kabančuka z žurnalistkaj «Lusterka» za 24 červienia 2023 hoda.
Vydańnie paćvierdziła, što heta paviedamleńnie sapraŭdnaje. A pakolki akaŭnt žurnalistki dakładna nie byŭ nikim uzłamany, zastajucca pytańni da ličbavaj biaśpieki Kabančuka.