U Litvie praciahvaje skaračacca kolkaść biełarusaŭ. Jak za hod źmianilisia ličby
Paśla 2020 hoda biełarusy pačali aktyŭna źjazdžać z krainy. Druhoj pa papularnaści paśla Polščy stała Litva, ale za 2024 hod kolkaść hramadzian Biełarusi tam zaŭvažna skaraciłasia.
07.01.2025 / 12:35
Ilustracyjny zdymak. Fota: «Naša Niva»
Maksimalna litoŭski dazvoł na žycharstva (lubych typaŭ) mieli 62 844 hramadzianina Biełarusi. Tak było pa stanie na 1 krasavika 2024 hoda. Da taho času ličba biełarusaŭ u Litvie ź dziejnymi DNŽ rasła (dla paraŭnańnia — 1 studzienia 2021 hoda DNŽ u Litvie mieli 23 440 biełarusaŭ). Ale paźniej tendencyja źmianiłasia.
Zhodna z apošnimi aficyjnymi źviestkami, pa stanie na 1 studzienia 2025 hoda, u Litvie zastałosia 57 511 biełarusaŭ ź dziejnymi DNŽ (lubych typaŭ). Heta minus 5 333 čałavieki ad piku ŭ krasaviku 2024 hoda abo minus 4656 biełarusaŭ z DNŽ u paraŭnańni z pačatkam minułaha hoda.
Fota: skrynšot z lrv.lt
A što ź inšymi zamiežnikami ŭ Litvie?
Ahułam u Litvie majuć DNŽ 217 988 zamiežnikaŭ. Za hod ličba skaraciłasia amal na 4 tysiačy čałaviek. Biełarusy ŭ śpisie zajmajuć druhoje miesca, sastupajučy tolki hramadzianam Ukrainy. Pa stanie na 1 studzienia ŭ Litvie naličvajecca 77 080 ukraincaŭ ź dziejnymi DNŽ. Ich kolkaść za hod taksama skaraciłasia (minus 9 273 čałavieki).
Na trecim miescy iduć hramadzianie RF — 14 978 čałaviek. Hod tamu było 15 888. Admietna, što hramadzianie Rasii zajmajuć pieršaje miesca pa kolkaści trymalnikaŭ PMŽ u Litvie — 8490, što bolš za pałovu ad ahulnaj kolkaści rasijan u Litvie. Heta aznačaje, što bolšaść rasijan, jakija žyvuć u Litvie, pryjechali tudy jašče da pačatku poŭnamaštabnaj vajny va Ukrainie.