Vydańnie Politico ahučyła nievierahodnyja scenary na 2025 hod. Adzin ź ich — źviaržeńnie Łukašenki
Vydańnie Politico skłała śpis 15 «čornych lebiedziaŭ» na 2025 hod — tak nazyvajuć nievierahodnyja padziei, jakija mohuć istotna źmianić žyćcio. Adno z pradkazańniaŭ tyčycca Biełarusi — heta źviaržeńnie ŭrada Alaksandra Łukašenki narodam.
06.01.2025 / 21:46
Fota: Gavriil Grigorov, Sputnik Kremlin Pool Photo via AP
Heta pradkazańnie Evielin Farkas, vykanaŭčaj dyrektarki Instytuta Makkiejna pry Univiersitecie štata Aryzona. Z 2012 pa 2015 hod jana zajmała pasadu namieśnika pamočnika ministra abarony pa Rasii, Ukrainie i Jeŭrazii.
U pradkazańni apisvajecca, što Śviatłana Cichanoŭskaja, adčuvajučy słabaść Rasii paśla parazy Asada ŭ Siryi i ekanamičnych ciažkaściaŭ, zaklikała ludziej zrynuć režym. Pucin u hetym scenary moža być asłableny tym, što Ukraina ustupiła ŭ NATA ci Rasija paciarpieła parazu na poli boju.
«Narod Biełarusi zmoh zdabyć svabodu, skarystaŭšysia pasłableńniem pazicyj Pucina i jaho niazdolnaściu ŭmiašacca i vyratavać Łukašenku», — kažacca ŭ pradkazańni.
Siarod inšych nievierahodnych prahnozaŭ na 2025-ty — uspyška infiekcyi, aljans Trampa i Si Czińpina, abvał finansavych rynkaŭ.
Varta adznačyć, što imaviernaść takich pradkazańniaŭ nizkaja. Naprykład, z 15 «čornych lebiedziaŭ», jakija Politico pradkazvała na 2024 hod, u toj ci inšaj stupieni spraŭdzilisia try — śmierć na mitynhu Trampa (ale tam apisvałasia patasoŭka prychilnikaŭ), napad na kandydata ŭ prezidenty ZŠA i chaos, vyklikany hłabalnym paciapleńniem (dapuścim, tut možna zhadać vialikuju pavodku ŭ Ispanii). Dva ekśpierty naohuł stavili na bunt suprać Pucina ŭ 2024-m. «Čornyja lebiedzi», zrešty, tak i nazyvajucca, bo małaimaviernyja.