Васьмігадовы хлопчык заблукаў і правёў пяць дзён у парку з ільвамі. Вось што дапамагло яму выжыць
Васьмігадовага хлопчыка (паводле іншых звестак, яму 7 гадоў) знайшлі жывым пасля таго, як ён правёў пяць дзён у запаведніку, населеным ільвамі і сланамі, на поўначы Зімбабвэ, піша Бі-бі-сі.
03.01.2025 / 21:42
Тынатэндэ Пуду. Фота: Mutsa Murombedzi / X
Выпрабаванні Тынатэндэ Пуду пачаліся, калі ён заблукаў як мінімум за 23 км ад дома ў небяспечным парку Матусадона, дзе жывуць дзікія жывёлы.
Падрабязнасці дзіўнага выратавання дзіцяці распавяла Муца Муромбедзі, член парламента ад правінцыі Заходні Машоналенд у Зімбабвэ.
Паводле яе слоў, хлопчык правёў у запаведніку пяць дзён. Ён «спаў на камяністым выступе, сярод рыкаючых ільвоў і сланоў, якія праходзілі побач, і харчаваўся дзікімі фруктамі».
У паляўнічым запаведніку Матусадона жывуць каля 40 ільвоў. Паводле звестак арганізацыі «Афрыканскія паркі», раней тут была адна з самых шчыльных папуляцый ільвоў у Афрыцы.
Упраўленне паркаў і дзікай прыроды Зімбабвэ пацвердзіла інцыдэнт, але паведаміла, што хлопчыку было сем гадоў, а не восем, як сказала дэпутатка, і ён прайшоў пехам 49 км ад дома.
Дэпутатка Муромбедзі адзначыла, што хлопчык выжыў дзякуючы сваім ведам пра дзікую прыроду і навыкам выжывання. Ён еў дзікія плады і капаў палкай невялікія студні ў сухіх рэчышчах рэк, каб здабыць ваду. Гэтым навыкам навучаюць у засушлівых раёнах.
Члены мясцовай супольнасці Ньяміньямі шукалі дзіця і кожны дзень білі ў барабаны, спрабуючы прывабіць яго дадому. Аднак знайсці хлопчыка ўдалося інспектарам парку.
На пяты дзень у запаведніку Тынатэндэ пачуў машыну рэйнджараў і пабег да яе, ледзь не размінуўшыся з імі, распавяла дэпутатка.
На шчасце, рэйнджары вярнуліся, заўважылі «свежыя сляды маленькіх чалавечых ног» і працягнулі пошукі, пакуль не знайшлі дзіця.
«Гэта, верагодна, быў яго апошні шанец выратавацца пасля пяці дзён у саване», — дадала дэпутатка.
Плошча парку складае больш за 1470 квадратных кіламетраў, і ў ім жывуць зебры, сланы, бегемоты, ільвы і антылопы.
У сацыяльных сетках людзі захапляюцца вытрымкай хлопчыка.
«Гэта па-за межамі чалавечага разумення», — напісаў адзін карыстальнік твітара.
Іншы адзначыў: «У яго будзе неверагодная гісторыя, калі ён вернецца ў школу».