U Čarnahoryi ŭ pieršy dzień novaha hoda strałok zabiŭ jak minimum 12 čałaviek
Paranienyja znachodziacca ŭ krytyčnym stanie.
02.01.2025 / 07:20
Fota: Risto Bozovic / AP
Jak minimum 12 čałaviek, u tym liku dvoje dziaciej, byli zabityja ŭ sieradu ŭdzień, 1 studzienia, u horadzie Cecińje ŭ Čarnahoryi. Jašče čaćviora atrymali ranieńni. Pra heta paviedamiŭ ministr unutranych spraŭ Daniła Šaranavič, pieradaje Bałkanskaja słužba Radyjo Svaboda.
Padazravany Aca Marcinavič skončyŭ žyćcio samahubstvam. Pavodle viersii śledstva, Marcinavič zabiŭ čatyroch čałaviek u adnym z baraŭ u centralnaj častcy horada, a zatym u inšych rajonach — jašče niekalki čałaviek, siarod jakich jość členy jaho siamji.
Ranienyja, pavodle słoŭ miedykaŭ, znachodziacca ŭ krytyčnym stanie.
Spačatku paviedamlałasia, što strałok źnik. Na vulicach Cecińje byli skancentravanyja palicejskija, u niekatorych rajonach pierakryty ruch, a ŭsie vyjezdy z horada zabłakavanyja. Da pošuku strałka dałučyłasia armija.
U zajavie palicyi ŭdakładniajecca, što zdareńnie nie źviazana z kanfliktami pamiž arhanizavanymi złačynnymi hrupami. Marcinavič byŭ umoŭna asudžany ŭ 2005 hodzie za chulihanstva na hod turmy, ale nie ličyŭsia asobaj, jakaja ŭjaŭlaje pahrozu biaśpiecy.
U 2022 hodzie ŭ Marcinoviča byli znojdzieny zbroja i vybuchoŭka. Za heta jaho prysudzili da troch miesiacaŭ turmy.
Urad Čarnahoryi abviaściŭ trochdzionnuju žałobu — 2, 3 i 4 studzienia — u suviazi z trahiedyjaj u Cecińje. U Padhorycy, Budvie i Kotary admienieny navahodnija kancerty.
Ułady Čarnahoryi paśla zdareńnia razhladajuć mahčymaść poŭnaj zabarony na vałodańnie zbrojaj.