Заснавальнік кампаніі HBO, першапраходца платнага тэлебачання, памёр ва ўзросце 98 гадоў
Чарльз Долан, які заснаваў некалькі найбуйнейшых амерыканскіх медыякампаній, у тым ліку Home Box Office (HBO) і Cablevision Systems, памёр ва ўзросце 98 гадоў ад натуральных прычын, піша «Голас Амерыкі».
30.12.2024 / 15:32
Чарльз Долан. Фота: Don Jacobsen/Newsday RM via Getty Images
У заяве, апублікаванай у суботу яго сям’ёй, паведамляецца, што Долан памёр ад натуральных прычын, пра што паведаміла прыналежнае да ягонага медыяхолдынгу выданне Newsday. «З вялікім смуткам паведамляем пра смерць нашага любімага бацькі і патрыярха Чарльза Долана, візіянера і заснавальніка HBO і Cablevision», — гаворыцца ў заяве.
Чарльз Долан пакінуў яркі след у гісторыі кабельнага тэлебачання.
У 1972 годзе ён заснаваў кампанію Home Box Office (сённяшні HBO), якая стала першапраходцам у галіне платнага тэлебачання. У 1973 годзе ён стварыў Cablevision, а ў 1984-м — тэлеканал American Movie Classics (AMC). Акрамя таго, Долан стаў ініцыятарам стварэння ў Нью-Ёрку News 12 — першага кругласутачнага мясцовага навінавага канала ў ЗША.
Нарадзіўся Долан у Кліўлендзе і паступіў ва Універсітэт Джона Кэрола ў прыгарадзе Кліўленда, аднак не скончыў яго.
У чэрвені 2016 года Cablevision была прададзена еўрапейскай тэлекамунікацыйнай кампаніі Altice за 17,7 мільярда даляраў.
На момант смерці маёмасць Чарльза Долана і яго сям’і ацэньвалася ў 5,4 мільярда даляраў. У яго засталося шэсць дзяцей, 19 унукаў і пяць праўнукаў. Яго жонка, Хелен Эн Долан, памерла ў 2023 годзе.