U studzieni piensii i dapamohi ŭ Biełarusi vypłaciać daterminova
Hrošy piensijaniery atrymajuć jašče da pravasłaŭnaha Rastva.
29.12.2024 / 17:51
Pra heta paviedamlaje «Biełpošta».
Sprava ŭ tym, što 7 studzienia buduć pracavać tolki dziažurnyja adździaleńni. Atrymać hrošy ŭ abjektach paštovaj suviazi ŭsich abłaściej Biełarusi i Minska možna budzie ŭžo z 4 studzienia.
U adździaleńniach pošty ŭ Homieli i Hrodnie piensii i dapamohi vypłaciać 6 studzienia.
Piensii praz poštu
Z 1 lipienia 2024 hoda piensii ŭ Minsku, haradach abłasnoha padparadkavańnia i rajonnych centrach vypłačvajucca ŭ bolšaści vypadkaŭ praz banki.
Prava atrymlivać ich praz poštu pa žadańni zachavałasia tolki dla piensijanieraŭ starejšych za 70 hadoŭ, invalidaŭ I i II hrupy, hramadzian, jakija nie majuć pašparta pa relihijnych pierakanańniach (pry najaŭnaści śpiecyjalnaha zaklučeńnia, što paćviardžaje asobu).
Praviły taksama nie źmianilisia dla tych, chto pražyvaje ŭ sielskaj miascovaści.
Z 1 studzienia 2025 hoda ŭkazam uvodziacca dadatkovyja katehoryi piensijanieraŭ, jakija zmohuć atrymlivać vypłaty na pošcie, u tym liku z dastaŭkaj na dom.
Siarod ich:
- invalidy III hrupy;
- asoby z abmiežavanaj zdolnaściu da samastojnaha pieramiaščeńnia;
- asoby, jakija ažyćciaŭlajuć dohlad za dziciom-invalidam va ŭzroście da 18 hadoŭ i atrymlivajuć dapamohu pa jaho dohladzie;
- piensijaniery, jakija dasiahnuli 70-hadovaha ŭzrostu da 1 studzienia 2025 hoda;
- asoby, zarehistravanyja pa miescy žycharstva ŭ adnym žyłym pamiaškańni ź invalidam I hrupy, jaki atrymlivaje piensiju na pošcie.
Inšyja katehoryi piensijanieraŭ pry žadańni taksama zmohuć pieravieści vypłaty z banka na poštu. Adnak pry ŭmovie apłaty pasłuh pošty pa ŭstalavanych taryfach za dastaŭku piensij.