U Ałbanii na hod całkam zabaranili TikTok paśla zabojstva padletka
Premjer-ministr Ałbanii Edzi Rama ličyć, što sacyjalnyja sietki «biaruć dziaciej u zakładniki».
22.12.2024 / 18:52
Ułady Ałbanii pryniali rašeńnie pra poŭnuju zabaronu TikTok na terytoryi krainy.
Zabarona budzie dziejničać 12 miesiacaŭ i ŭstupić u siłu na pačatku 2025 hoda, piša Reuters.
«Na praciahu adnaho hoda my całkam jaho zakryjem dla ŭsich. U Ałbanii nie budzie TikTok», — zajaviŭ Rama na sustrečy z baćkoŭskimi kamitetami.
Rama abvinavaciŭ sacyjalnyja sietki, u pryvatnaści TikTok, u raspalvańni hvałtu siarod moładzi jak u škołach, tak i za ich miežami.
U listapadzie ŭ Ałbanii adbyłosia rezanansnaje zabojstva: 14-hadovaha školnika zarezali adnakłaśniki. Miascovyja ŚMI paviedamili, što kanflikt pamiž dvuma padletkami pačaŭsia ź pierapałki ŭ sacyjalnych sietkach. U TikTok taksama źjavilisia videa, dzie niepaŭnaletnija vykazvali padtrymku zabojstvu.
«Prablema siońnia nie ŭ našych dziaciej, prablema siońnia ŭ nas, prablema siońnia ŭ našym hramadstvie, prablema siońnia ŭ TikTok i ŭsich astatnich, chto biare našych dziaciej u zakładniki», — zajaviŭ Rama.
U TikTok zajavili, što imknucca da «terminovaj jasnaści» ad ałbanskaha ŭrada.
«My nie znajšli dokazaŭ taho, što ŭ złačyncy abo achviary byli akaŭnty ŭ TikTok, i šmatlikija spravazdačy paćvierdzili, što videa, źviazanyja z hetym incydentam, publikavalisia na inšaj płatformie, a nie ŭ TikTok», — zajaviŭ pradstaŭnik kampanii.
U apošni čas niekalki jeŭrapiejskich krain, uklučajučy Francyju, Hiermaniju i Biełaruś, uviali abmiežavańni na vykarystańnie sacyjalnych sietak dla dziaciej. A samy strohi zakon byŭ pryniaty ŭ Aŭstralii: u listapadzie parłamient zaćvierdziŭ poŭnuju zabaronu na sacyjalnyja sietki dla dziaciej da 16 hadoŭ.