Беларуска расказала, колькі зарабляе як Снягурка ў Польшчы
Лізавета Кохман жыве ў Польшчы больш за 10 гадоў. Тут яна скончыла два ўніверсітэты, пазней працавала тэлевядучай, менеджарам і выкладчыкам. Але да ўсяго гэтага раз у год Лізавета становіцца Снягуркай і выступае перад дзецьмі і дарослымі. Дзяўчына расказала MOST, навошта ёй гэта, хто яе кліенты і колькі можна зарабіць у святы.
22.12.2024 / 13:58
«Нават без касцюма ўсе завуць мяне Снягуркай»
У дзяцінстве Лізавета марыла стаць актрысай. Родны горад — Ліду — беларуска называе кузняй творчасці: там шмат навучальных устаноў, дзе выкладаюць розныя віды мастацтва.
Снягуркай Ліза вырашыла стаць у 2020 годзе, калі ўжо жыла ў Варшаве. Тады для гэтага яна замовіла з Мінска спецыяльны касцюм. І яшчэ адзін — для Дзеда Мароза. Дзяўчына кажа, што пачуваецца вельмі арганічна ў вобразе свайго казачнага персанажа. У сацсетках яна нават запісала жартоўнае відэа, дзе тлумачыць, чаму менавіта яе можна лічыць сапраўднай Снягуркай.
— Нават без касцюма ўсё называюць мяне Снягуркай, — кажа яна ў ім.
Каб знайсці кліентаў, Лізавета стварыла асобную старонку ў інстаграме. Дзяўчына ўспамінае, што ўжо пасля першых выступаў зразумела, што занялася новай справай не дарма: гэтае хобі падабалася ёй з кожным днём усё больш.
— Гэта такая казка, якую ты ствараеш і часткай якой сам становішся. У гэты час ты адыходзіш ад паўсядзённасці, ад дарослых праблем і вяртаешся ў дзяцінства, — кажа яна.
Спачатку заказы паступалі толькі на дзіцячыя выступленні. Лізавета прыязджала дадому да кліентаў з 30-хвіліннай праграмай: Дзед Мароз і Снягурка спявалі песні з дзецьмі, вадзілі карагоды і ладзілі конкурсы. Пазней дуэту сталі прапаноўваць выступаць і для дарослых: фірмы і арганізацыі запрашаюць іх на карпаратывы, а бары і рэстараны просяць весці вечарыны ў навагоднюю ноч. Самае доўгае выступленне Лізаветы доўжылася каля пяці гадзін.
Фота: ded_moroz.pl / Instagram
На родную мову няма попыту
Усе кліенты дзяўчыны — эмігранты з постсавецкай прасторы. Як правіла, гэта беларусы, украінцы ці казахі. Аднойчы Лізавета выступала на дзіцячым ранішніку ў пасольстве Казахстана.
А вось польская сям'я запрашала яе толькі адзін раз, і тое, бо ў ёй маці была родам з Беларусі. Праграма выступленняў у Лізаветы складзена па-руску, хаця ў паўсядзённым жыцці яна мае зносіны па-беларуску. Яна з сумам прызнае, што на родную мову пакуль няма попыту.
— Перад тым як прыняць замову, я высылаю кліентам анкету. У ёй яны паказваюць свае пажаданні, у тым ліку і мову. Звычайна, акрамя рускай, ніякую іншую мову не просяць. Адзін раз толькі папрасілі выступіць на польскай, — са шкадаваннем кажа дзяўчына.
«Казалі, што гэта прадукт рускага свету»
Нават у такога станоўчага персанажа, як Снягурачка, знайшліся хейтэры. Асабліва пасля ўварвання Расіі ва Украіну. Шмат хто казаў Лізавеце, што Снягурка — гэта савецкі персанаж, а значыць, прадукт «рускага свету». Яна з такімі абвінавачваннямі не згодна.
— Лічу, што Снягурка павінна быць па-за палітыкай. Хаця б яе можна не ўмешваць у гэта? — смяецца яна. — А наогул, усё, што прыдумана ў СССР, аўтаматычна не становіцца рускім. Там жыло шмат народаў, гэта і іх спадчына таксама, — лічыць дзяўчына.
Фота: ded_moroz.pl / Instagram
Колькі зарабляюць Снягуркі
Нягледзячы на хейт, у беларускі па-ранейшаму шмат украінскіх кліентаў. Дзеці эмігрантаў, кажа яна, звычайна вераць у Дзеда Мароза і Снягурку, а не ў Святога Мікалая ці Санта-Клаўса.
Працы ў Лізы з гадамі становіцца ўсё больш. Заказы актыўна паступаюць з пачатку снежня да навагодняй ночы. 31-га чысла ў яе звычайна запланавана каля 30 выступаў.
Каб выканаць усе замовы, Ліза пашырыла каманду: яна наймае яшчэ дзве пары Дзядоў Марозаў і Снягурак. Кожная з іх выконвае каля дзясятка заказаў. І мінімум адна з іх працуе ў навагоднюю ноч вядучымі ў бары ці рэстаране. Такія замовы робіць, напрыклад, сетка бараў Beer Station, адкрытых беларусамі.
За снежань Ліза зарабляе ў вобразе Снягуркі каля 5 тыс. злотых (каля 1200 даляраў).
У астатнюю пару года ў яе ёсць і іншая праца. Раней яна вяла папулярную англамоўную праграму на анлайн-тэлебачанні, а зараз дзяўчына працуе менеджарам у італьянскім рэстаране, а яшчэ выкладае танцы і фізкультуру ў беларускай школе «Я дома». Кажа, гэта нядрэнны дадатак да яе зарплаты.
Зрэшты, дзяўчына задумваецца пра тое, каб зрабіць святы сваёй асноўнай працай і адкрыць уласнае івэнт-агенцтва. Кажа, хацела б зарабляць на любімай справе круглы год.