Čamu Łukašenka choča ŭziać udzieł u pieramovach pa Ukrainie i jakich harantyj biaśpieki paprosić?
Biełaruskaje Ministerstva zamiežnych spraŭ, a ciapier jašče i rasijskaje vystupajuć za toje, kab biełaruski bok braŭ udzieł u mahčymych mirnych pieramovach pa Ukrainie. Čamu heta tak važna dla režymu i pra jakija harantyi biaśpieki jon kaža, razvažaje Valer Karbalevič.
18.12.2024 / 19:14
Alaksandr Łukašenka spadziajecca być udzielnikam mirnych pieramoŭ pa Ukrainie. Fota: Getty Images
Tema znoŭ aktyvizavałasia
Dniami namieśnik ministra zamiežnych spraŭ Juryj Ambrazievič zajaviŭ, što Biełaruś pretenduje na ŭdzieł u mirnych pieramovach pa Ukrainie, intaresy aficyjnaha Minska pavinny być uličanyja.
«Dla nas važna atrymać harantyi našaj ułasnaj biaśpieki. Finalnyja damoŭlenaści pavinny abaviazkova ŭličvać u tym liku i intaresy biełaruskaha boku», — skazaŭ jon na pasiadžeńni kansultatyŭnaj rady pa spravach biełarusaŭ zamiežža pry MZS.
Paźniej patrabavańnie Juryja Ambrazieviča padtrymała pradstaŭnica MZS Rasii Maryja Zacharava. Ź jaje słoŭ, Rasija ličyć nieabchodnym udzieł Biełarusi ŭ mirnych pieramovach z Ukrainaj.
Čaho hetym dabivajecca Łukašenka?
Palityčny ahladalnik «Radyjo Svaboda» Valer Karbalevič adznačaje, što Łukašenka jašče ŭ 2022 hodzie kazaŭ, što choča brać udzieł u pieramovach.
«Kali dzieści na haryzoncie zamajačyli pieramovy, to cikavaść da hetaj temy abvastryłasia. Spačatku sam Łukašenka pra heta kazaŭ nieadnojčy, potym Ambrazievič, a ciapier i Zacharava hetuju ideju padtrymała», — kaža Karbalevič.
Samo žadańnie Biełarusi ŭdzielničać u mahčymych pieramovach analityk nazyvaje davoli łahičnym, tym bolš što biez udziełu Biełarusi nie vypadaje kazać pra sistemu rehijanalnaj jeŭrapiejskaj biaśpieki, ale adrazu adznačaje, što isnuje šmat važnych niuansaŭ.
Fota: Getty Images
Nie ŭsio tak prosta
Pieršy — heta abmiežavanaja subjektnaść, druhi — prablemy ź lehitymnaściu Łukašenki.
«Kali hladzieć na situacyju ź jeŭrapiejskaha boku, to niezaležnaść i suvierenitet Biełarusi znachodziacca pad pytańniem. Siońnia jeŭrapiejskija palityki razhladajuć Biełaruś jak niejkuju rasijskuju maryjanietku.
Pa-druhoje, paśla 2020 hoda Zachad nie pryznaje Łukašenku jak lehitymnaha kiraŭnika Biełarusi. Tamu tut udzieł Biełarusi sutykajecca adrazu ź dźviuma prablemami», — ličyć Karbalevič.
Praz heta, na jaho dumku, Łukašenka i imkniecca z dapamohaj takoha hieapalityčnaha pytańnia vyrašyć prablemu svajoj subjektnaści.
«Nie vypadkova jon pravodzić faktyčna daterminovyja vybary, kab paśpieć na hety pieramoŭny ciahnik. Jon choča tym samym skazać, što novyja vybary abnulajuć tyja prablemy ź lehitymnaściu, jakija ŭźnikli paśla vybaraŭ 2020 hoda.
Maŭlaŭ, ciapier u mianie novaja lehitymnaść, bo bolš nichto nie zmoža skazać, što niechta, jak Cichanoŭskaja, atrymaŭ bolš hałasoŭ».
Fota: «Naša Niva»
Takim čynam, razvažaje Karbalevič, Łukašenka imkniecca pieraharnuć staronku i atrymać pryznańnie jaho zakonnym kiraŭnikom Biełarusi.
Aproč hetaha, jon tym samym choča delehitymizavać Śviatłanu Cichanoŭskuju.
«Taksama Łukašenka takim čynam choča atrymać harantyi dla svajho režymu nie tolki ad Rasii, ale i ad Zachadu. Tamu zadačy pierad režymam stajać šmatpaviarchovyja», — ličyć Karbalevič.
Adkul Łukašenka adčuvaje niebiaśpieku?
MZS kazaŭ, što Minsk na mirnych pieramovach zachoča atrymać harantyi biaśpieki. Što majecca na ŭvazie?
«Łukašenka ŭvieś čas kaža, što isnuje niebiaśpieka vajennaha napadu z boku NATA, z boku Polščy, jakaja choča zachapić zachodniuju Biełaruś, što ŭ Litvie rychtujucca da napadu niejkija zamiežnyja vojski i h.d.
I tut u mianie jość ujaŭleńnie, što padobnyja zajavy — heta nie tolki čystaja prapahanda. Łukašenka ŭsurjoz moža vieryć, što NATA źbirajecca napaści, bo jon žyvie ŭ svaim śviecie, dzie karcina śvietu dalokaja ad realnaści. Voś jamu i patrebnyja harantyi, što NATA nie źbirajecca napadać.
Heta vyhladaje śmiešna, ale mnie padajecca, što Łukašenka nasamreč aścierahajecca hetaha.
Taksama jość Ukraina i Połk Kalinoŭskaha. Łukašenka taksama nastolki šmat pra jaho kazaŭ, što moža sapraŭdy vieryć, što Połk moža pajści ŭ vyzvalenčy pachod. Tamu jon vidavočna choča harantyj i z boku Ukrainy».
Aproč hetaha, Karbalevič ličyć, što Łukašenka adčuvaje i niebiaśpieku z boku Rasii.
Fota: Getty Images
«Praz heta jon choča, kab adnym macham była harantavanaja biaśpieka i suvierenitet Biełarusi i z boku Rasii. Z hledzišča taho, jak situacyju razumieje Łukašenka, usio heta maje sens. Bo siońnia, jak mahčyma nikoli raniej u historyi niezaležnaj Biełarusi, mienavita ad vonkavych čyńnikaŭ zaležyć šmat čaho ŭ krainie. Jak stabilnaść hetaha režymu, tak i suvierenitet Biełarusi. U takoj situacyi žadańnie Łukašenki zastrachavacca z usich bakoŭ prynamsi źjaŭlajecca zrazumiełym», — ličyć Valer Karbalevič.
Navošta ŭdzieł Biełarusi patrebien Rasii?
Što tyčycca Rasii, to, na dumku Karbaleviča, jana zacikaŭlenaja ŭ tym, kab Biełaruś brała ŭdzieł u pieramovach, bo heta budzie dla jaje dadatkovym hołasam.
«Niama sumnievaŭ, što biełaruski i rasijski bok u takim vypadku buduć dźmuć u adnu dudku — heta całkam zrazumieła».
MZS Rasii: Ličym nieabchodnym udzieł Biełarusi ŭ pieramovach pa Ukrainie
«U nas niama sił viarnuć ich». Zialenski — pra Krym i Danbas
Zialenski vyklučyŭ zamarozku vajny dla pieramovaŭ z Rasijaj paśla prychodu Trampa da ŭłady
Volha Karač: Na mirnych pieramovach Biełaruś pavinien pradstaŭlać Paźniak. A Cichanoŭskaja słabaja