«У нас няма сіл вярнуць іх». Зяленскі — пра Крым і Данбас
Прэзідэнт Украіны Уладзімір Зяленскі заявіў, што ўкраінскае войска не можа сваімі сіламі вярнуць Крым і Данбас. Аб гэтым ён сказаў у інтэрв'ю французскай газеце Le Parisien, піша «Медуза».
18.12.2024 / 12:38
Прэзідэнт Украіны Уладзімір Зяленскі. Фота: прэс-служба палітыка
Выданне спытала ў Зяленскага, на якія кампрамісы ён гатовы пайсці, каб завяршыць вайну. «[Гатовы] аддаць Крым ці Данбас, хаця б часова?» — спытала журналістка газеты.
Зяленскі адказаў:
«Мы не можам аддаць нашыя тэрыторыі. Канстытуцыя Украіны забараняе нам гэта рабіць. Дэ-факта гэтыя тэрыторыі зараз кантралююць расіяне. У нас няма сілы, каб вярнуць іх. Мы можам разлічваць толькі на дыпламатычны ціск з боку міжнароднай супольнасці, каб прымусіць Пуціна сесці за стол перамоваў».
Таксама ў Зяленскага спыталі, ці гатовы ён сесці за адзін стол перамоў з Уладзімірам Пуціным. «Важна не тое, хто сядзіць насупраць. Важна, у якім стане вы знаходзіцеся, калі вядзеце перамовы. Я не думаю, што мы знаходзімся ў слабой пазіцыі, але і ў моцнай мы таксама не знаходзімся. Ці будзем мы ў НАТА? Мы не ведаем. Ці будзем мы часткай Еўрапейскага саюза? Так, у будучыні, але калі?» — адказаў ён.
«Сесці за стол перамоў з Пуціным у такіх умовах азначала б даць таму права вырашаць усё ў нашай частцы свету. Спачатку нам трэба распрацаваць мадэль, план дзеянняў або мірны план — называйце як хочаце. Тады мы зможам прадставіць яго Пуціну ці, у шырэйшым сэнсе, расійцам», — дадаў ён.
Зяленскі падкрэсліў, што ніводны сусветны лідар «не мае права весці перамовы з Пуціным без Украіны». «Мы нікому не дэлегавалі гэты мандат. Мы — ахвяры», — заявіў Зяленскі.
Улады Украіны, па даных крыніц WSJ, у снежні пачалі перамовы аб спыненні расійска-ўкраінскай вайны з камандай абранага прэзідэнта ЗША Дональда Трампа, які неаднаразова казаў, што гатовы хутка завяршыць гэты канфлікт.
Зяленскі 7 снежня сустрэўся з Трампам у Парыжы. Пасля перамоў у Парыжы Трамп заклікаў бакі спыніць агонь і пачаць перамовы.
Украінскае МЗС паведаміла, на якія перамовы і гарантыі Мінск мае права прэтэндаваць
Кавалеўскі: Інтарэсы Беларусі ў мірных перамовах па Украіне нельга ігнараваць
Ярмак: Для перамоваў з Расіяй патрэбныя гарантыі
Трамп выступае за размяшчэнне еўрапейскіх войскаў ва Украіне для кантролю над будучым перамір'ем