Jahoraŭ pierapadličyŭ sumu, jakaja pajšła biznesu z dapamohi Jeŭrasajuza: Heta mienš, čym ja kazaŭ raniej, ad siły 4-7%
Były śpikier Kaardynacyjnaj rady Andrej Jahoraŭ jašče raz adkazaŭ na abvinavačańni Paŭła Łatuški adnosna raźmierkavańnia hrošaj ad ES.
17.12.2024 / 15:26
Andrej Jahoraŭ i Pavieł Łatuška. Fota: Ofis Śviatłany Cichanoŭskaj, «Naša Niva»
Nahadajem, raniej kiraŭnik Narodnaha antykryzisnaha ŭpraŭleńnia i namieśnik kiraŭnika Abjadnanaha pierachodnaha kabinieta Pavieł Łatuška zajaviŭ, što za raźmierkavańnie hrošaj, jakija demakratyčnyja siły Biełarusi atrymlivali ad ES, da niadaŭniaha času adkazvaŭ Andrej Jahoraŭ. I što nibyta kala 30% srodkaŭ, vydzielenych ES biełaruskaj hramadzianskaj supolnaści, išli na biznes.
Sam ža były śpikier Kaardynacyjnaj rady śćviardžaje, što nie byŭ adkaznym za raźmierkavańnie srodkaŭ Jeŭrasajuza. Ich raźmiarkoŭvaje sam ES. A na biznes z taho pakieta dapamohi pajšło 10-15%.
U intervju Malanka.media Jahoraŭ udakładniŭ situacyju:
«Pieršapačatkova Jeŭrapiejski Sajuz prapanavaŭ kansultacyi pa dapamozie dla Biełarusi. Ułasna, ja prydumaŭ antykarupcyjnuju schiemu, kab svaje patreby vyznačali sami biełaruskija arhanizacyi i inicyjatyvy, a nie Ofis Śviatłany Cichanoŭskaj ci Pavieł Łatuška, ci ja, ci jašče niechta. U hetych kansultacyjach udzielničajuć bolš za 60 arhanizacyj, jakija vyznačajuć patreby kankretnaha siektara.
Mienavita jany ličać. Ja hetych patreb, hetych ličbaŭ nikoli nie vyznačaŭ. (…) Rašeńnie, kolki vyłučyć, usio roŭna zaŭsiody tolki zastavałasia za Jeŭrasajuzam. Ich raźmiarkoŭvaje Jeŭrapiejski Sajuz, heta hrošy ich padatkapłacielščykaŭ Jeŭrapiejskaha Sajuza».
U praces pryniaćcia rašeńnia, zaŭvažaje Jahoraŭ, uciahnutyja dziasiatki arhanizacyj, biaruć udzieł niekalki sotniaŭ ludziej. Danyja dastupnyja dla ŭsich struktur demakratyčnych sił.
«Praces moža być abmiežavany z punktu hledžańnia taho, što šyrokija masy ludziej nie mohuć u hetym udzielničać. Vy razumiejecie sami — isnujuć i prablemy biaśpieki, i prablemy kvalifikacyi», — zaŭvažaje Jahoraŭ.
Jon udakładniŭ sumu, jakaja pajšła na biznes.
«Ciapier pa hetych adkrytych krynicach (tym, što publikuje ES — NN) možna mierkavać, što biełaruski biznes atrymaŭ z 2020 hoda kala 5,5 miljona jeŭra.
Navat ja byŭ zanadta aptymistyčny ŭ svaich ekśpiertnych acenkach. Heta značna mienš za tyja 10-15%, pra jakija ja kazaŭ. [Nasamreč biełaruski biznes atrymaŭ] ad siły 4-7% ad usich abjomaŭ», — zaŭvažaje Jahoraŭ.
Nie abyšoŭ jon i asobu Paŭła Łatuški. Pa jaho słovach, «Łatuška jak vychadziec ź sistemy Łukašenki pierachodzić absalutna ŭsie miežy etyki ŭ baraćbie z tymi, u kaho adroznaje ad jaho mierkavańnie. Chiba što resursaŭ nie chapaje, kab dubinkami razahnać tych, chto dumaje inakš».