Стала вядома, супраць каго ў Беларусі ЕС увёў новыя санкцыі
Еўрасаюз увёў санкцыі супраць 26 фізічных асоб і дзвюх кампаній з Беларусі.
16.12.2024 / 16:21
Рада ЕС 16 снежня дапоўніла санкцыйныя спісы новымі фізічнымі асобамі і кампаніямі з Беларусі.
Пад санкцыі трапіў лагістычны аператар ТАА «ВЛАТЭ Лагістык», які валодае транспартна-лагістычнымі цэнтрамі «Брузгі» і «Бераставіца», а таксама ў спісе кампанія «Рузэкспедыцыя», якая «атрымлівае выгаду ад рэжыму і садзейнічае абыходу санкцый ЕС, удзельнічаючы ў пастаўках аўтамабіляў, продаж якіх з ЕС у Беларусь забаронены».
Сярод фізічных асоб называюцца фінансавы дырэктар Dimicandum Invest Holding LTD Андрэй Свірыдаў, саўладальнікі ТАА «ВЛАТЭ Лагістык» Дзмітрый Замулевіч і Уладзімір Аркадзьеў, гендырэктар «Беларуськалія» Андрэй Рыбакоў, старшыня Беларускай рэспубліканскай калегіі адвакатаў Аляксей Швакаў.
У санкцыйны спіс таксама дадалі суддзяў, адказных за фабрыкаванне палітычна матываваных прысудаў:
Вера Філонік — суддзя Брэсцкага абласнога суда;
Ірына Прадун — суддзя і старшыня суда Рагачоўскага раёна Гомельскай вобласці;
Віталь Сініла — суддзя і старшыня суда Мастоўскага раёна Гродзенскай вобласці;
Вадзім Мазоль — суддзя суда Пружанскага раёна Брэсцкай вобласці;
Ніна Шастак — суддзя Брэсцкага абласнога суда;
Ірына Майко — суддзя Мінскага абласнога суда;
Васіль Бягун — суддзя Гомельскага абласнога суда;
Яўген Брэган — суддзя Брэсцкага абласнога суда;
Аляксандр Мохараў — суддзя суда Савецкага раёна Гомеля;
Алеся Осіпава — суддзя суда Цэнтральнага раёна Гомеля;
Віктар Новік — старшыня суда Жабінскага раёна.
У санкцыйныя спісы дадзеныя асобы, адказныя за катаванні ў месцах абмежавання волі і бесчалавечнае стаўленне да незаконна затрыманых. Гэта:
Вадзім Мурашка — начальнік папраўчай калоніі №13 у Глыбокім;
Сяргей Бярэйшык — супрацоўнік СІЗА №1;
Мікалай Мушкароў — супрацоўнік СІЗА №1;
Сяргей Петраковіч — начальнік папраўчай калоніі №9 у Горках
Віктар Лутцаў — начальнік медыцынскай часткі турмы №1 Гродна.
Прапановы па суддзях і супрацоўніках калоній, якіх дадаць у санкцыйныя спісы ЕС, з доказамі і падрабязным абгрунтаваннем каманда Народнага антыкрызіснага ўпраўлення перадавала ў Еўрапейскую службу знешніх дзеянняў 11 кастрычніка 2024 года. Пасля юрыдычнай экспертызы санкцыі ўзгадніла Рада ЕС.