Латушка — камандзе Бабарыкі: Большасць выступае за тое, каб працягваць ціск
«Ёсць апазіцыя да апазіцыі, якая выказвае свой пункт гледжання. Але мой спіс атрымаў 35% галасоў на выбарах у Каардынацыйную раду. Мы стварылі кааліцыю большасці».
13.12.2024 / 14:52
Павел Латушка. Фота: SOPA Images LightRocket via Getty Images
У апошні час сярод дэмакратычнай апазіцыі актывізавалася дыскусія аб неабходнасці змены стратэгіі. За гэта выступае каманда Віктара Бабарыкі. У прыватнасці, Таццяна Хоміч, сястра палітзняволенай Марыі Калеснікавай, прапанавала Еўропе аслабляць санкцыі супраць Беларусі, калі гэта дапаможа вызваляць палітвязняў.
Як адзначыў Павел Латушка ў эфіры праграмы «Обычное утро», бабарыканцы вельмі актыўна, публічна і падчас усіх стратэгічных дыялогаў і кансультатыўных груп прапаноўваюць спыніць ціск на Лукашэнку, пачаць з ім дыялог.
Па меркаванні Латушкі, каманда Бабарыкі заклікае «сесці і дамовіцца з Лукашэнкам, каб вярнуцца ў 2019 год» і такім чынам прапануюць змяніць стратэгію. Але сам Латушка катэгарычна нязгодны з такой прапановай.
«Хопіць ілюзій. Трэба зразумець, што Лукашэнка ніколі не зменіць унутраную палітыку Беларусі. (…) Ён не вызваліць усіх палітвязняў. Давайце не будзем гэтай ілюзіі мець. (…) Ён не зменіць знешнюю палітыку, бо ён падзяліўся ўладай у 2020-м годзе з Пуціным», —
адзначыў палітык і падкрэсліў, што не згодны з пазіцыяй каманды Бабарыкі. Латушка пераконвае, што яго пазіцыя — гэта пазіцыя большасці.
«Мы агітавалі ісці на выбары ў Каардынацыйную раду. (…) У нас адбыліся выбары ў прадстаўнічы орган дэмакратычных сіл Беларусі. Там, напрыклад, мой спіс атрымаў 35% галасоў.
Мы стварылі кааліцыю большасці. Мы дэмакратычна прадстаўляем большасць. І большасць выступае за тое, каб працягваць ціск і прыцягнуць Лукашэнку да адказнасці.
Гэтую пазіцыю падтрымлівае Святлана Ціханоўская. І гэтую пазіцыю поўнасцю падтрымлівае Аб'яднаны пераходны кабінет. Ёсць апазіцыя да апазіцыі, якая выказвае свой пункт гледжання. Але ў нас ёсць пазіцыя большасці».
Латушка адзначыў, што жорсткай пазіцыі адносна Лукашэнкі прытрымліваецца і ЕС.
«На сёння Еўрасаюз не будзе мяняць ніякую стратэгію. Бо Лукашэнка не толькі не змяняе ўнутраную і знешнюю палітыку, ён пагаршае яе. Калі ён нават вызваляе некалькі асоб, то адначасова [садзіць]. (…) Кожны дзень рэпрэсіі не спыняюцца. Змяняе [рэжым] палітыку — тады і Еўрасаюз будзе рухацца».
У Баранавічах арыштавалі сем былых работнікаў закрытай незалежнай газеты «Інтэкс-Прэс»
Марафон рэпрэсій не спыняецца. Паказваем жахлівыя лічбы
Латушка выказаўся пра ідэю вярнуць заходніх паслоў у Беларусь