Što śviet dumaje pra vajnu va Ukrainie ciapier? Karta pazicyj krain
Amierykanskaje vydańnie Newsweek padrychtavała detalovuju kartu, jakaja adlustroŭvaje ciapierašni hłabalny bałans sił u pytańni padtrymki Ukrainy. Voś jak na hety momant padzieleny śviet.
30.11.2024 / 01:36
Fota: AP
Za amal try hady vajny va Ukrainie ŭsio bolš krain stanoviacca ŭskosna ci niepasredna ŭciahnutymi ŭ kanflikt, a sam jon praciahvaje zastavacca ŭ centry suśvietnaj uvahi, piša vydańnie Newsweek.
Na asnovie ciapierašniaj hieapalityčnaj abstanoŭki vydańnie padrychtavała kartu, dzie adlustravanyja aktualnyja pazicyi krain śvietu datyčna vajny va Ukrainy i padtrymki taho ci inšaha boku kanflikta.
Krainy Zachadu, uklučajučy ZŠA i Jeŭrapiejski sajuz, a taksama Vialikabrytanija i Kanada na siońniašni dzień zastajucca hałoŭnymi sajuźnikami Ukrainy ŭ vajnie suprać Rasii — usie jany nie tolki asudžajuć dziejańni Maskvy, ale i praciahvajuć padtrymlivać Kijeŭ finansava, palityčna i vajskova.
Razam ź imi ŭ śpis vajskovych pastaŭščykoŭ Ukrainy, pavodle Newsweek, uvachodziać Aŭstralija, Novaja Ziełandyja, Bieliz (znachodzicca ŭ Centralnaj Amierycy) i navat Sudan, dzie idzie aktyŭnaja hramadzianskaja vajna (ułady krainy pastaŭlajuć Kijevu zbroju naŭzamien na dapamohu ŭ baraćbie z prarasijskimi sudanskimi hrupoŭkami).
Mnohija krainy Paŭdniovaj Amieryki, Paŭnočnaj Afryki i Azijacka-Cichaakijanskaha rehijona praciahvajuć asudžać rasijskaje ŭvarvańnie va Ukrainu i akazvać humanitarnuju dapamohu (z hetych krain taksama iduć dabraachvotniki).
Karta pazicyj krain śvietu pa vajnie va Ukrainie pa stanie na siońnia. Krynica: Newsweek / Flourish
U toj ža čas Rasija ŭ vajskovym płanie raźličvaje na Biełaruś, Iran, Irak i KNDR.
Pry hetym vydańnie Newsweek nie stała ŭklučać u śpis rasijskich vajskovych pastaŭščykoŭ Kitaj, choć jon i vyrablaje dla Rasii śpiecyjalnyja vajskovyja bieśpiłotniki i pieradaje Biełarusi detali dla rakiet i bombaŭ, jakija potym vykarystoŭvajucca rasijskaj armijaj suprać Ukrainy.
Dypłamatyčnuju padtrymku i najmitaŭ Rasija atrymlivaje ad Kanfiederacyi Sachiela (Mali, Nihier, Burkina-Faso), Nikarahua, Vieniesueły, Turkmienistana, Siryi, Mjanmy i inšych aŭtarytarnych krain.
Kudy niebiaśpiečna jechać biełarusam, jakich na radzimie pieraśledujuć za palityku KARTY
Danyja ŭsich karystalnikaŭ Pokemon GO ciapier pieratvoracca ŭ hłabalnuju mapu miascovaści