112-hadovaha mužčynu z Brazilii pryznali najstarejšym u śviecie
Žaau Maryńju Nietu z Brazilii pryznali samym starym mužčynam u śviecie. Pra heta paviedamlaje aficyjny sajt Knihi rekordaŭ Hinesa.
29.11.2024 / 18:03
Fota: guinnessworldrecords.com
Nietu atrymaŭ hety status paśla śmierci brytanca Džona Tynisvuda 26 listapada. Tynisvudu taksama było 112 hadoŭ, a Nietu ciapier 112 hadoŭ i 52 dni. Jon apošni žyvy mužčyna, jaki naradziŭsia ŭ 1912 hodzie. Mužčyna šmat hadoŭ žyvie ŭ prybiarežnym štacie Sieara, u municypalitecie Apujary.
Amal usio žyćcio Nietu zajmaŭsia fiermierstvam. Jon aŭdavieŭ jašče ŭ 1994 hodzie, ale ŭ jaho pa-raniejšamu vialikaja siamja: šaściora dziaciej, 22 unuki, 15 praŭnukaŭ i troje prapraŭnukaŭ. Jon nazvaŭ sakretam svajho daŭhalećcia dobrych ludziej, jakija jaho atačajuć, i imknieńnie zaŭsiody zastavacca ŭ kole rodnych i blizkich. A taksama — dyjetu. Kožny dzień jon jeść aŭsianku, miasa i maroha — afrykanskuju raznavidnaść dzikaha špinatu.
Fota: guinnessworldrecords.com
Pavodle danych arhanizacyi LongeviQuest, u piaciorku najstarejšych mužčyn na płaniecie zaraz uvachodziać troje žycharoŭ Brazilii. Druhim samym starym mužčynam paśla Nietu staŭ 111-hadovy Žazinu Levinu Fierejra, a 110-hadovy Prymu Aliŭjery zamykaje piaciorku. 111-hadovyja Kien Uiks z Aŭstralii i Iłarya Aroska Lemus ź Mieksiki zajmajuć treciaje i čaćviortaje miescy.
Uvohule ž najstarejšym čałaviekam śvietu siońnia źjaŭlajecca Tamika Itaoka. Jana naradziłasia 23 maja 1908 hoda, i ciapier joj 116 hadoŭ.
Va ŭzroście 112 hadoŭ pamior samy stary mužčyna ŭ śviecie
Pamior samy stary čałaviek na płaniecie
U zaaparku Hiermanii pamior najstarejšy ŭ śviecie laniviec. Jamu było 54 hady
U Brytanii pamierła samaja staraja kotka ŭ śviecie. Joj było 33 hady