Vykrytyja ŭ Brytanii špijony źbiralisia vyvieźci ŭ Rasiju žurnalista Chrysta Hrozieva, jaki dapamahaŭ Navalnamu
Były apieracyjny dyrektar Wirecard Jan Marsalek, jakoha brytanskaje śledstva ličyć kiraŭnikom rasijskaj špijonskaj sietki ŭ krainie, abmiarkoŭvaŭ sa svaim dziełavym partnioram Arlinam Rusievym mahčymaje vykradańnie žurnalista-daśledčyka Bellingcat Chrysta Hrozieva i dastaŭku jaho ŭ Rasiju.
29.11.2024 / 14:17
Guardian
Pra heta stała viadoma na sudzie, dzie napiaredadni pačaŭsia razhlad spravy ab špijonskaj sietcy. Varyjant z vyvazam u Rasiju abmiarkoŭvaŭsia i ŭ inšaj hučnaj historyi, jakaja nijak nie źviazanaja sa spravaj Marsaleka — z apublikavanaj raniej pierapiski Leanida Nieŭźlina vynikaje, što pierapravić u krainu chacieli adnaho z kiraŭnikoŭ FBK Leanida Vołkava, piša «Ahienctva».
Pavodle źviestak śledstva, Marsalek i Rusieŭ u 2021 hodzie ŭ pierapiscy abmiarkoŭvali varyjanty dziejańniaŭ u dačynieńni da Hrozieva. Siarod ich zhadvałasia nazirańnie za im, vykradańnie jaho i dastaŭka ŭ Maskvu, zabojstva daśledčyka i ŭkaranieńnie ŭ Bellingcat. Akramia taho, u pierapiscy havorka išła ab vykradańni ŭ Hrozieva noŭtbuka i telefona z nastupnym źniščeńniem abo pieradačaj u rasijskaje pasolstva.
Špijony, pavodle danych abvinavačvańnia, sačyli za Hrozievym u Aŭstryi, Čarnahoryi i Ispanii.
Uletku 2022 hoda na žurnalisckaj kanfierencyi ŭ Čarnahoryi pakoj Hrozieva ŭ hateli byŭ uskryty ŭ jaho adsutnaść, raspaviadali «Ahienctvu» čaćviora znajomych žurnalistaŭ i ŭdzielnikaŭ kanfierencyi ŭ Čarnahoryi. Pa słovach adnaho ź ich, uzłomščyki mahli atrymać dostup da infarmacyi ŭ asabistych hadžetach žurnalista. Sam Hrozieŭ paćvierdziŭ, što ź jaho numara źnik telefon.
Pa spravie prachodzić hrupa hramadzian Bałharyi, jakich śledstva ličyć udzielnikami špijonskaj sietki. Akramia Rusieva, u hrupu ŭvachodzili: Bizier Džambazaŭ, Katryn Ivanava, Vania Habierava, Cichamir Ivančaŭ. Rusieŭ i Džambazaŭ pryznalisia, što zajmalisia špijanažam.
Jašče adnoj metaj špijanažu byŭ šef-redaktar The Insider Raman Dabrachotaŭ. U apieracyi suprać jaho mierkavana ŭdzielničała Ivanova.
Ahułam, pa danych abvinavačvańnia, jany pravodzili šeść klučavych apieracyj.
Akramia sačeńnia za žurnalistami, jany zajmalisia zbor infarmacyi ab važnych dla Maskvy abjektach, uklučajučy amierykanskuju vajskovuju bazu «Patč-Kazarmy» ŭ Štutharcie. Inšymi metami špijonskaj sietki byli były supracoŭnik SK Rasii Kirył Kačur, jakoha ŭ Rasii pryznali «zamiežnym ahientam», i kazachski palityk Bierhiej Ryskalijeŭ, jaki ŭciok z Kazachstana i jaki atrymaŭ u Vialikabrytanii palityčny prytułak. Akramia taho, abvinavačanyja płanavali pravieści demanstracyju la ambasady Kazachstana ŭ Łondanie, kab potym pieradać źviestki pra jaje «arhanizatara» Kazachstanu i palepšyć stasunki krainy z Rasijaj.
Marsalek, jakoha abvinavačvańnie ŭvažaje za kiraŭnika špijonskaj sietki, zajmaŭ pasadu apieracyjnaha dyrektara finansavaha startapa Wirecard, jaki zbankrutavaŭ u 2020 hodzie, kali aŭdytary vyjavili, što ź jahonych rachunkaŭ źnikli amal 2 młrd jeŭra.
Ułady Hiermanii i Aŭstryi ličać Marsaleka klučavoj fihuraj u kradziažy hrošaj, jon znachodzicca ŭ mižnarodnym vyšuku. Paśla krušeńnia Wirecard Marsalek palacieŭ u Biełaruś, adkul dabraŭsia da Rasii. Pavodle źviestak žurnalistaŭ, jon atrymaŭ rasijski pašpart na imia Hiermana Baženava. Pra mahčymyja suviazi Marsaleka z rasijskimi śpiecsłužbami ŭ 2020 hodzie pisali ŭ sumiesnym rasśledavańni vydańnia The Insider, Bellingcat i Der Spiegel.