«Nie čapajcie, jany ź siamjoj adpačyvać pryjšli». Minčanka sustreła ŭ akvaparku «Lebiadziny» zhraju tarakanaŭ

Heta nie pieršy taki incydent u historyi staličnaha akvaparku.

19.11.2024 / 13:15

Naviedvalnica akvaparku apublikavała ŭ tyktoku videa ab niepryjemnaj sustrečy: pad ležakom jana znajšła cełuju zhraju tarakanaŭ.

Spačatku minčanka ŭbačyła dvuch tarakanaŭ kala ležaka. Ale pad meblaj jaje čakaŭ nie vielmi pryjemny siurpryz: tam nasiakomych było jašče bolš.

«Nu, tarakany ž taksama chočuć kupacca», — iranizuje aŭtar videa.

@ksuprokop Vot takaja antisanitarija v samom dorohom akvaparkie strany #lebiažij #akvapark #minsk ♬ orihinalnyj zvuk - KSIU i SIERIAŁnyje intieriesantY ツ

Rolik, źniaty, jak śćviardžaje aŭtar, 16 listapada, sabraŭ bolš za 100 tysiač prahladaŭ i bolš za 200 kamientaroŭ. Hledačy padzialilisia na dva łahiery. Adny kažuć, što taksama niezadavolenyja sanitarnymi ŭmovami ŭ akvaparku. 

«Radujciesia! Dzie jość tarakany, tam niama błaščyc», — žartuje adzin z kamientataraŭ. Druhi prosić nie turbavać nasiakomych: «Nie čapajcie ich, jany siamjoj na adpačynak pryjšli».

«Z maja miesiaca ničoha nie pamianiałasia! Jany i ŭ raździavałkach, i ŭ dušavych, karaciej, usiudy», — piša jašče adzin kamientatar.

Inšyja śćviardžajuć, što nikoli nie sustrakali tarakanaŭ u minskim akvaparku i im usio padabajecca. 

Administracyja «Lebiadzinaha» prakamientavała situacyju dla vydańnia Onliner.b:

«Pa sutnaści videa, raźmieščanaha ŭ sacyjalnaj sietcy TikTok, administracyja RK «Akvapark @Lebiadziny» infarmuje: śpiecyjalistami kompleksu z pryciahnieńniem supracoŭnikaŭ Centra hihijeny i epidemijałohii na sistemnaj asnovie pravodziacca dezinsiekcyjnyja i deratyzacyjnyja mierapryjemstvy».

Darečy, heta nie pieršaja takaja historyja ŭ staličnym akvaparku. Dva hady tamu ŭ sietcy źjaviłasia padobnaje videa: tady tarakanaŭ taksama znajšli pad ležakami. Administracyja paabiacała pravieści čarhovuju dezinsiekcyju i zajaviła, što takija mierapryjemstvy pravodziacca ŭ akvaparku niekalki razoŭ na hod.

Nashaniva.com