Za chabar zatrymali hałoŭnaha inžyniera na adnym z pradpryjemstvaŭ Minharvykankama
U kastryčniku 2024 hoda byŭ zatrymany hałoŭny inžynier i namieśnik hienieralnaha dyrektara ŭpraŭleńnia darožna-mastavoha budaŭnictva i dobraŭparadkavańnia Minharvykankama, paviedamlaje «Lusterka».
16.11.2024 / 18:36
Ilustracyjny zdymak. Fota: uvdgomel / Telegram
Upraŭleńnie darožna-mastavoha budaŭnictva i dobraŭparadkavańnia (UDMSiD) — heta dziaržaŭnaje pradpryjemstva, jakoje ŭvachodzić u strukturu Minharvykankama. Jano zajmajecca budaŭnictvam i ramontam daroh, a taksama vytvorčaściu tratuarnaj plitki, hranulavanaha asfaltu i žalezabietonnych kanstrukcyj dla mastoŭ i daroh.
Pa słovach adnaho z supracoŭnikaŭ pradpryjemstva, jaki doŭhi čas pracuje va UDMSiD, paśla prychodu ŭ červieni 2022 hoda novaha hienieralnaha dyrektara Uładzimira Łatuškina ŭ ich pačalisia prablemy.
Uładzimir Łatuškin, hienieralny dyrektar Upraŭleńnia darožna-mastavoha budaŭnictva i dobraŭparadkavańnia Minharvykankama. Fota: udms.by
«U krasaviku 2023-ha Łatuškin pryznačyŭ novaha hałoŭnaha inžyniera i, pa sumiaščalnictvie, namieśnika hienieralnaha dyrektara. Im staŭ jahony siabar Alaksandr Łapo», — kaža surazmoŭca.
Pavodle jaho, u kastryčniku 2024-ha Łapo prosta na pracoŭnym miescy zatrymali za chabar.
«Zatrymali jaho supracoŭniki adździeła baraćby z ekanamičnymi złačynstvami MUS, dakładnyja pryčyny nam nie paviedamili, ale viadoma, što Łapo padazrajuć pavodle art. 430 Kryminalnaha kodeksa ŭ atrymańni chabaru. Usich kiraŭnikoŭ vyklikali na dopyty. Chodziać čutki, što hienieralnaha dyrektara zatrymlivali na try dni».
Zatrymańnie Łapo «Lusterku» paćvierdziŭ jašče adzin supracoŭnik UDMSiD. Žurnalistu vydańnia, jaki patelefanavaŭ u pryjomnuju pradpryjemstva pad vyhladam klijenta, paviedamili, što Alaksandr Łapo nie pracuje tam užo bolš za miesiac.
Supracoŭniki UDMSiD raskazvajuć, što siłaviki z ABEZ ciapier aktyŭna praviarajuć dakumientacyju pradpryjemstva i dziejnaść jaho kiraŭnictva. Jany nie vyklučajuć, što ŭ chutkim časie na pradpryjemstvie mohuć adbycca novyja zatrymańni.