Traim studentam z rasijskaha Čalabinska dali da 15 hadoŭ źniavoleńnia pa spravie ab sprobie padpału na čyhuncy
Centralny akruhovy vajenny sud u Jekaciarynburhu prysudziŭ da terminaŭ ad 12,5 da 15 hadoŭ pazbaŭleńnia voli troch studentaŭ z Čalabinska, abvinavačanych u sprobie padpału relejnaj šafy na čyhuncy, piša Miedyjazona.
15.11.2024 / 12:49
Fota: It's My City
Samy vialiki termin — 15 hadoŭ — atrymaŭ 19-hadovy Daniił Nurejeŭ, pieršyja piać hadoŭ jon pavinien adbyć u turmie, astatni termin — u kałonii strohaha režymu. 18-hadovym Dźmitryju Davydzienku i Andreju Je. prysudzili adpaviedna pa 13 i 12,5 hoda pazbaŭleńnia voli. Davydzienku taksama daviadziecca pravieści ŭ turmie pieršyja piać hadoŭ termina, Andreju Je. — čatyry hady.
Ab zatrymańni studentaŭ stała viadoma ŭ pačatku studzienia 2023 hoda. Pavodle viersii śledstva, maładziony źbiralisia padpalić relejnyja šafy na Paŭdniova-Uralskaj čyhuncy — na stancyi Patanina niedaloka ad horada Kapiejsk. Davydzienku i Andreja Je. zatrymali paśla niaŭdałaj sproby padpału. Arhanizavać padpał prapanavaŭ Davydzienku Nurejeŭ, i toj uziaŭ z saboj adnakurśnika, studenta Paŭdniova-Uralskaha techničnaha kaledža. Davydzienka raspaviadaŭ, što siłaviki jaho katavali.
Nurejeva zatrymali paźniej. Maładych ludziej abvinavacili ŭ sprobie ździajśnieńnia dyviersii. Jak śćviardžaje śledstva, ich matyvam byŭ «padryŭ ekanamičnaj biaśpieki i abaronazdolnaści» Rasii, a instrukcyi pa padpale jany atrymlivali «ad asoby, jakaja dziejničała ŭ intaresach Ukrainy».
Nurejeŭ i Davydzienka admaŭlajuć, što dziejničali pa jakich-niebudź palityčnych matyvach. Na dopycie jany zajavili, što padtrymlivajuć rasijskaje ŭvarvańnie va Ukrainu
Maładyja ludzi patłumačyli, što padpał im zamoviła kampanija pa absłuhoŭvańni čyhunki, nazvu jakoj nie ahučvajuć. Pavodle ich słoŭ, kampanija pavinna była atrymać prybytak ad zamieny abstalavańnia paśla padpału.
Śledstva taksama śćviardžaje, što dziejańni studentaŭ kaardynavaŭ 19-hadovy pieciarburžac Viktar Vostraknutaŭ, jaki źjaŭlajecca adnym z 12 abvinavačanych u sieryi padpałaŭ transfarmatarnych budak u roznych rehijonach Rasii. Mienavita jon rastłumačyŭ čalabincam nieabchodnaść padpału na čyhuncy kamiercyjnaj vyhadaj dla nienazvanaj kampanii, ličać siłaviki.
Zhodna z relizam SK, adnaho z studentaŭ pryznali vinavatym jašče pa adnym artykule — pra finansavańnie teraryzmu. U kartcy spravy imiony asudžanych schavanyja, ale vierahodna, što havorka idzie pra Nurejeva, jaki atrymaŭ samy vialiki termin. Jak śćviardžaje śledstva, jon pieradaŭ hrošy na nabyćcio kampanientaŭ dla vybuchovych rečyvaŭ, z dapamohaj jakich pavinny byli ździejśnić terakt u inšym rehijonie.