Jašče adna achviara Ksienii Lebiedzievaj: paśla jaje prahramy va Ukrainie zatrymali arhanizatara ŭciokaŭ ad mabilizacyi
Va Ukrainie zatrymali mužčynu, jaki arhanizoŭvaŭ pierapraŭku praź miažu ŭciekačoŭ ad mabilizacyi. Pierad hetym jon daŭ intervju viadučaj BT Ksienii Lebiedzievaj, a potym pasprabavaŭ źbiehčy ŭ Biełaruś, piša «Radyjo Svaboda».
12.11.2024 / 13:35
Ksienija Lebiedzieva. Skrynšot videa
Va Ukrainie zatrymali ŭradženca Žytomirskaj vobłaści, jaki arhanizavaŭ kanał «dapamohi» dla tych ukraincaŭ, jakija ŭciakajuć ad mabilizacyi ŭ Biełaruś, Małdovu i eŭrapiejskija krainy.
Jak adznačajecca ŭ adpaviednym sudovym rašeńni, jaki maje ŭ svaim rasparadžeńni Svaboda, jaho zatrymali pry sprobie niezakonnaha pierasiačeńnia miažy. Suprać jaho zaviali kryminalnuju spravu pavodle č. 1 artykułu 114-1 i č. 2 artykułu st. 332 Kryminalnaha kodeksu Ukrainy (pieraškoda zakonnaj dziejnaści Ŭzbrojenych sił Ukrainy ŭ asablivy peryjad i niezakonnaje pierapraŭleńnie asobaŭ praź miažu). Zatrymanamu pahražaje źniavoleńnie na termin ad 5 da 8 hadoŭ z pazbaŭleńniem prava zajmać peŭnyja pasady ci zajmacca peŭnaj dziejnaściu na termin da 3 hadoŭ.
Ukrainca zatrymali 2 žniŭnia pry sprobie ŭciačy ŭ Biełaruś praz čarnobylskuju zonu. Ciapier jon znachodzicca ŭ Čarnihaŭskim śledčym izalatary.
Pierad svaim zatrymańniem ukrainiec daŭ interviju biełaruskaj prapahandystcy Ksienii Lebiedzievaj, u jakim pachvaliŭsia svajoj dziejnaściu, raskazaŭ pra svaje pohlady na mabilizacyju i raźvićcio Ŭkrainy.
Što vyśvietliła śledztva
Śledčyja vyśvietlili, što zatrymany administravaŭ Telegram-kanały «1 RieałTV Zapiś tranślacij» (205 udzielnikaŭ), «1 Riealnoje tielevidienije» (919 udzielnikaŭ), «1RegionTelevision» (14 909 udzielnikaŭ), u jakich abmiarkoŭvali niezakonnaje pierasiačeńnie dziaržaŭnaj miažy, kab paźbiehnuć mabilizacyi, i sposaby, jak heta zrabić.
Tielefonnyja numary zatrymanaha byli pryviazanyja da nazvanych Telegram-kanałaŭ (jany ciapier zablakavanyja). Tyja, chto skarystaŭsia dapamohaj hetych kanałaŭ, musili zapisvać videa i pieradavać zapisy svaim «pamočnikam» ab paśpiachovym pierasiačeńni miažy.
Śledztva identyfikavała minimum šeść asobaŭ, jakim zatrymany davaŭ parady i rekamendacyi ab pierasiačeńni miažy pa-za punktami propusku. Aproč taho, u skanfiskavanych telefonach śledčyja znajšli jahonaje listavańnie z prapahandystkaj Ksienijaj Lebiedzievaj, jakoje stała dadatkovym dokazam jahonaj supraćpraŭnaj dziejnaści.
Što ŭkrainiec raskazaŭ Lebiedzievaj
Śledztva pakul nie apublikavała niepasrednaje listavańnie zatrymanaha ź Lebiedzievaj. Viadoma, što jana abmiarkoŭvała ź im pierasiačeńnie hramadzianami Ŭkrainy dziaržaŭnaj miažy ź Biełaruśsiu hramadzianami Ŭkrainy pa-za punktami propusku, a taksama i budučyja ŭcioki zatrymanaha. U svaim interviju jon taksama asudziŭ mabilizacyju va Ŭkrainie.
Svaboda znajšła na staroncy prapahandystki ŭ Youtube prahramu z hetym interviju pad nazvaj «Jak uciačy z Ukrainy praz zachodniuju miažu. Dapamožnik dla ŭchilistaŭ», apublikavanuju sioleta 23 lipienia.
Ksienija Lebiedzieva nie nazvała imia ŭkrainca i pradstaviła jaho jak administratara Telegram-kanału, jaki vydaje instrukcyi ŭchilistam ad mabilizacyi. Hołas jaje surazmoŭnika imavierna źmienieny, abo tekst, jaki jon napisaŭ ci nahavaryŭ, ahučyŭ inšy čałaviek.
«Źjaviłasia mahčymaść dapamahčy ludziam nie aŭtamat uziać, a cichieńka ŭziać zaplečnik, tudy pakłaści niejkija enerhietyčnyja batončyki tam, nia viedaju, vuściłki, škarpetki, kompas, mapu, jakaja ŭ ofłajn-režymie pracuje, padrychtavacca — usie niuansy, vyličyć, jak dajechać, dzie vyskačyć ź ciahnika, pieraleźci, pierapaŭźci. I voś usie hetyja niuansy jany ŭ nas atrymlivajuć», — skazaŭ ukrainiec u efiry prahramy Lebiedzievaj «Jak uciačy z Ukrainy praz zachodniuju miažu. Dapamožnik dla ŭchilistaŭ», apublikavanaj sioleta 23 lipienia.
Zatrymany ŭkrainiec taksama raskazaŭ Lebiedzievaj, čamu niekatoryja ŭchilisty časta vybirajuć Biełaruś dla ŭciokaŭ. Pieraličanyja im pryčyny całkam adpaviadajuć prapahandysckim lozunham, jakija ciapier vykrastoŭvajuć u Rasiei i Biełarusi.
«Ja razumieju, što lepš pierajechać u toje hramadztva, dzie 9 traŭnia bolš kaštoŭnaje, čym šeście 14 dyvizii das reiche galizien SS. Čamu ja nie mahu pakłaści kvietki na mahiłu voinu? A tamu što «zdradnik». Voś hetaja chreń mianie ŭžo dastała. Razumiejecie, jak? A voś fašysty maršyrujuć, a pensijaneram pryjści nielha, bo nacyki vyjduć i budzie skandał. Ja ŭ takim jašče pavinien žyć? Nie, prabačcie. Ja ŭ takim nie mahu. Ja razumieju, što, viedajecie, paśla pierajezdu ŭsie prablemy nia vyrašu. Ale ja vyrašu samuju hałoŭnuju: maje dzieci pavinny žyć, budavać siemji ŭ tym hramadztvie, jakoje zdarovaje, pravilnaje, jakoje prahresuje, a nia tut voś hetaj banderaŭščynaj, prasiaknutaje naniaviściu», — skazaŭ Lebiedzievaj ukrainiec.
Pry hetym u svajoj prahramie Lebiedzieva nazyvaje takich ludziej, jak jaje surazmoŭca, «pamočnikami» i paźbiahaje ŭdakładnieńnia, što arhanizatary ŭciokaŭ za miažu atrymlivajuć vialikija hanarary. Svaju ŭvahu prapahandystka kancentruje na tym, što najpierš na schiemach pierapraŭleńnia praź miažu zarablajuć mienavita ŭkrainskija pamiežniki i dziaržaŭnyja orhany Ŭkrainy, jakija zajmajucca vyzvaleńniem ad mabilizacyi.
U jakich kryminalnych spravach fihuravała imia prapahandystki
Heta druhi viadomy vypadak kryminalnaj spravy, u jakoj fihuruje Ksienija Lebiedzieva.
Sioleta ŭ vieraśni ŭ Litvie za špijanaž na karyść biełaruskich specsłužbaŭ na 9 hadoŭ turmy asudzili hramadzianina Litvy, jurysta Mantasa Danielusa. Jon z 2022 hodu źbiraŭ infarmacyju dla biełaruskich specsłužbaŭ, u asnoŭnym pra aktyvistaŭ, jakija žyvuć u Litvie, i pieradavaŭ sabranyja źviestki prapahandystcy Ksienii Lebiedzievaj.
U spravie jość źviestki, što Danielus, vykonvajučy zadańnie Lebiedzievaj, u žniŭni 2022 hodu ŭ Vilni sustrakaŭsia z byłym vajarom połku Kalinoŭskaha Viktaram Savičam i pierakanaŭ taho, što infarmacyja pra połk cikavić ambasadu ZŠA. Zapisaŭšy razmovu z Savičam, Danielus pierasłaŭ jaje Lebiedzievaj praz Telegram.
Vilenski akruhovy sud tak i nia zmoh apytać Saviča, bo letaś u kastryčniku 34-hadovy Savič zahinuŭ u DTZ u Hryhoravie (Hryhiškach), jaho źbiła mašyna.
U sudzie Danielus zajaviŭ pra Ksieniju Lebiedzievu: «U spravie niama jasnych źviestak, što jana kadravy aficer KDB».
Mantasa Danielusa zatrymali ŭ Litvie 28 vieraśnia 2022 hodu pry sprobie ŭciačy ŭ Biełaruś. Zhadanaha vyšej ukrainca taksama zatrymali pry sprobie ŭciačy ŭ Biełaruś.
U žniŭni 2023 hodu Eŭraźviaz uvioŭ suprać Ksienii Lebiedzievaj sankcyi. Razam ź joj pad abmiežavańni trapili jašče dva prapahandysty — Vadzim Hihin i Jaŭhien Pustavy.