Žurnalisty nazvali imiony imaviernych zabojcaŭ lotčyka-pierabiežčyka Maksima Kuźminava
Kryminalist MUS RF i były čekist mohuć być vykanaŭcami zabojstva rasijskaha lotčyka-pierabiežčyka Maksima Kuźminava, vyjavili «Važnyja historyi». Paśla zabojstva vykanaŭcy zabojstva ŭciakli i spalili svoj aŭtamabil.
11.11.2024 / 23:31
Padazravanyja pa spravie ab zabojstvie rasijskaha lotčyka Maksima Kuźminava ŭ Ispanii — dvoje rasijan. Pra heta havorycca ŭ siužecie prahramy 60 Minutes telekanała CBS.
CBS apublikavaŭ fota padazravanych, jakija im pieradali krynicy ŭ ispanskim śledstvie. Jak paviedamlajuć žurnalisty, źleva naprava na fatahrafijach: były aficer KDB i jaho svajak, pałkoŭnik MUS. Ich imiony žurnalisty nie nazyvajuć.
Krajni źleva na fota — 74-hadovy śpiecsłužbist Siarhiej Haramyka, ustanavili «Važnyja historyi». Jak pisała hazieta «Bracki ahlad», u pačatku 90-ch jon uznačalvaŭ haradski adździeł Ministerstva biaśpieki RF (były KDB i budučaja FSB) u Bracku. Taksama ŭ 1992 hodzie jaho nazyvali načalnikam słužby biaśpieki Brackaha aluminijevaha zavoda.
Akramia hetaha, z dadzienych uciečak vynikaje, što Haramyka ŭ 2008-2013 hadach ličyŭsia ŭ kampanii «Rusał».
Siarhiej Haramyka i supracoŭniki Brackaha aluminijevaha zavoda. Fota: «Sovieršienno siekrietno»
Mužčyna pasiaredzinie — 47-hadovy padpałkoŭnik palicyi, načalnik adździeła aŭtatechničnych ekśpiertyz i daśledavańniaŭ ekśpiertna-kryminalistyčnaha centra HU MUS Rasii pa Irkuckaj vobłaści Vasil Haramyka, vyjavili «Važnyja historyi».
Pra jaho nieadnarazova pisała miascovaja presa.
Vasil Haramyka. Fota: univiersitet prakuratury
Paćvierdžańniaŭ, što mužčyny źjaŭlajucca svajakami, «Važnym historyjam» znajści nie ŭdałosia.
Taksama CBS paviedamiŭ, što padazravanyja spalili aŭtamabil, na jakim pierasoŭvalisia paśla zabojstva Kuźminava, i pakinuli jaho «ŭ nastolki izalavanym miescy, što zabojcam, chutčej za ŭsio, spatrebiłasia b dapamoha miascovych žycharoŭ, kab daviedacca pra jaho miescaznachodžańnie».
Kuźminava rasstralali ŭ lutym. Pieršym pra jaho zabojstva paviedamiŭ fejkavy ispanamoŭny telehram-kanał, źviazany z byłym słužačym Minabarony RF. Pa dadzienych miascovaha infarmahienctva EFE, lotčyk atrymaŭ piać kulavych ranieńniaŭ, zabojcy ŭciakli na aŭto.
U žniŭni 2023 hoda Kuźminaŭ pierahnaŭ rasijski viertalot Mi-8 va Ukrainu padčas apieracyj HUR. U intervju ŭkrainskamu błohieru Uładzimiru Zołkinu jon raspavioŭ, što zrabiŭ heta dobraachvotna. Na rasijskim TB lotčyku pahražali likvidacyjaj.
CBS paviedamiŭ, što Kuźminava pachavali ŭ mahile bieź imieni na poŭdni Ispanii.