Kvatery, jakija znachodziacca ŭ pracesie pryvatyzacyi, mohuć znoŭ stać dziaržaŭnymi. Pry jakoj umovie?
Takija vypadki ŭžo byli nie raz.
10.11.2024 / 16:57
Pa jakich pryčynach kvatery, jakija znachodziacca ŭ pracesie pryvatyzacyi, mohuć znoŭ stać dziaržaŭnymi i chto ŭ zonie ryzyki, ahienctvu «Minsk-Naviny» raskazali ŭ administracyi Leninskaha rajona stalicy.
Zhodna z Ukazam Łukašenki ad 16.12.2013 № 563 «Ab niekatorych pytańniach pravavoha rehulavańnia žyllovych adnosin» pryvatyzacyja pamiaškańniaŭ dziaržaŭnaha žyllovaha fondu zaviaršyłasia 30 červienia 2016 hoda. Byłym najmalnikam, jakija zaklučyli dahavor na pryvatyzacyju i apłacili nie mienš za 10% ad acenačnaha koštu kvatery, naležyć unosić astatniuju sumu ŭ rasterminoŭku roŭnymi dolami terminam da 40 hadoŭ.
Košt pryvatyzacyi i, adpaviedna, štomiesiačnych płaciažoŭ vyznačaŭsia ŭ zaležnaści ad roznych faktaraŭ — miesca raźmiaščeńnia kvatery, jaje spažyvieckich jakaściaŭ, indeksa jakaści navakolnaha asiarodździa, stupieni znosu doma i inšych. Dla adnych ułaśnikaŭ razavaja vypłata moža składać niekalki rubloŭ, dla inšych — dziasiatki rubloŭ. Paradak raźlikaŭ za pryvatyzacyju padobny z uniasieńniem płaciažoŭ za žyllova-kamunalnyja pasłuhi.
Adroźnieńnie ŭ tym, što złosnym daŭžnikam pa rašeńni suda pahražaje nie vysialeńnie ci prymus da adčužeńnia žyłoha pamiaškańnia, jak u vypadku z praterminoŭkaj za kamunałku, a źmianieńnie statusu kvatery — jana pierastaje być ułasnaściu hramadzianina i znoŭ stanovicca dziaržaŭnaj.
Pry hetym pieravodzicca ŭ razrad arendnaj z nastupnaj płataj nie tolki za ŽKP, ale i za karystańnie žyłym pamiaškańniem.
Namieśnica kiraŭnika administracyi Leninskaha rajona Darja Davidovič raskazvaje, što daŭžnikam jany spačatku dasyłajuć apaviaščeńni, kab zapłacili.
«Tak, za dzieviać miesiacaŭ 2024-ha nakiravana 210 apaviaščeńniaŭ. Akramia taho, majem znosiny z uładalnikami kvadratnych mietraŭ pa telefonie, zaprašajem ich u adździeł žyllovaj palityki administracyi dla bolš detalovaj hutarki. Tłumačym, što pytańnie apłaty lepš vyrašyć, nie davodziačy jaho da suda.
Sioleta daŭžnikam rajona nakiravali 44 apaviaščeńni z patrabavańniem apłacić zapazyčanaść u paradku dasudovaha ŭrehulavańnia sprečki. U sud Leninskaha rajona padadziena:
— siem iskavych zajaŭ ab skasavańni damovy pryvatyzacyi, ź jakich try zadavolenyja, pa dvuch sprava spynienaja ŭ suviazi z pahašeńniem doŭhu, jašče dźvie znachodziacca na razhladzie;
— 13 pazovaŭ ab spahnańni zapazyčanaści, ź jakich siem zadavolenyja, pa dvuch adkaźniki raźličylisia z abaviazkam.
U cełym sumy zapazyčanaści pa Leninskim rajonie nie takija značnyja. Na kaniec vieraśnia miełasia zapazyčanaść pa apłacie za try i bolš miesiacaŭ pa 26 dahavorach na sumu 7 974 rubli 53 kapiejki, u tym liku zvyš hoda ličyŭsia doŭh u pamiery 5 336 rubloŭ 11 kapiejek pa 11 dahavorach pryvatyzacyi.
«Kali kazać pra tendencyi, to ŭ apošnija hady kolkaść daŭžnikoŭ źnižajecca. Naprykład, na kaniec krasavika 2022-ha ŭłaśnikam z praterminavanaj zapazyčanaściu zvyš troch miesiacaŭ nakiravali bolš za 300 apaviaščeńniaŭ ab pahašeńni doŭhu ŭ dobraachvotnym paradku, na razhladzie ŭ sudzie znachodzilisia 26 pazovaŭ».
Daviedacca ab zapazyčanaści i pahasić jaje možna praź sistemu ARIP pa nastupnym šlachu: «Nieruchomaść» — «Pryvatyzacyja» — «Minsk» — «HFU Minharvykankama» — «Pryvatyzacyja žyłych pamiaškańniaŭ».
U apošnim padraździele pad kodam pasłuhi treba ŭnieści numar damovy, i prahrama vystavić sumu doŭhu. Taksama pa pytańniach najaŭnaści zapazyčanaści možna źviarnucca ŭ finansavy adździeł administracyi rajona.