Byłoha biełaruskaha palitviaźnia zatrymali na matčy ŭ Varšavie za admovu addać antyłukašenkaŭski banier
Paśla matču «Lehija» — «Dynama-Minsk» biełarus pravioŭ noč u izalatary i atrymaŭ dvuchhadovuju zabaronu chadzić na futboł. Fanaty polskaha kłuba vykazali abureńnie dziejańniami achovy stadyjona.
09.11.2024 / 21:39
Zatrymańnie Dźmitryja Abramuka. Fota pradastaŭlena Dźmitryjem Abramukam
Pra heta paviedamlaje vydańnie Most.
Dźmitryj Abramuk kaža, što pachod na matč u Varšavie byŭ dla jaho sposabam pratestu suprać režymu Łukašenki: u Biełarusi jaho raniej asudzili na dva hady źniavoleńnia, a ŭ Varšavie Dźmitryj žyvie z 2023 hoda. Jon uziaŭ z saboj bieła-čyrvona-bieły ściah i płanavaŭ hladzieć hulniu razam ź siabram.
— My ŭziali bilety na zvyčajnuju trybunu za bramaj. Na stadyjonie da nas padyšła dziaŭčyna i skazała, što biełarusam lepš prajści ŭ haściavy siektar. Tam užo sabralisia inšyja chłopcy z BČB-ściahami, — raspaviadaje Dźmitryj.
Biełarus nie viedaŭ, što ŭ haściavym siektary fanaty zapłanavali pierformans, ale, ubačyŭšy baniery z antyrežymnymi łozunhami, vyrašyŭ padtrymać suajčyńnikaŭ.
— Ja, naohuł, dumaŭ, što ničoha nie budzie. Ale biełarusy sabralisia i arhanizavali pierformans suprać Łukašenki. Viadoma, ja padtrymaŭ i nie chavaŭ svoj tvar. Što ŭžo chavacca, mianie i tak viedajuć u Biełarusi. I jak byłomu palitviaźniu mnie jość što skazać režymu.
Zatrymańnie i noč u izalatary
Dźmitryja zatrymali ŭ siaredzinie pieršaha tajma. Ściuardy padyšli da jaho i zapatrabavali addać banier, jaki jon trymaŭ. Biełarus admoviŭsia i akazaŭ supraciŭ.
— U siektary byli frazy ź niekalkich banieraŭ, usie jany byli nakiravanyja suprać Łukašenki i jaho milicyi. Kali da mianie padyšli ściuardy, ja nie adpuskaŭ banier. Jany pačali hruba jaho ŭ mianie adbirać. Kali pazabirali ŭsie baniery ŭ inšych biełarusaŭ, to padyšli da mianie i vyvieli.
Zabarona na naviedvańnie futboła
Ściuardy pieradali Dźmitryja palicyi. Zatym jaho dastavili ŭ izalatar, dzie jon znachodziŭsia da suda, jaki adbyŭsia na nastupny dzień.
— Noč pravioŭ u izalatary. Adnosiny narmalnyja, umovy taksama — lepš, čym u Breście, dzie mianie trymali ŭ 2021 hodzie. Ranicaj pakarmili, a ŭ abied pačaŭsia sud. Dali navat pierakładčyka. Padčas suda ja spasyłaŭsia na toje, što nie razumieŭ, što kazali ściuardy. Sapraŭdy nie razumieŭ, ale zdahadvaŭsia, što jany chočuć zabrać banier. Mnie było niezrazumieła, čamu fanatam «Lehii» možna trymać baniery, a ŭ nas usio adabrali. Sudździa mnie zdaŭsia narmalnym, ale vyrašyŭ mianie pakarać: daŭ dva hady zabarony na matčy ŭ Polščy. U abvinavačańni patrabavali jašče štraf u 2 tys. złotych, ale sudździa jaho nie pryznačyŭ.
Pastanova sudu. Dakumient pradstaŭleny Dźmitryjem Abramukam
Dźmitryj — futbolny fanat: u rodnym Breście jon padtrymlivaŭ miascovaje «Dynama», ale paśla 2020 hoda admoviŭsia. Paśla emihracyi ŭ Varšavu biełarus rehularna chadziŭ na matčy «Lehii» i zbornaj Polščy. Zabarona stała dla jaho niečakanaściu.
— Ja lublu futboł i prasiŭ chacia b 500 złotych štrafu i hod zabarony, ale sudździa nie źmianiŭ rašeńnie. Vynik hetaj historyi dla mianie adziny: ciapier navat u Polščy ja nie mahu publična vykazacca suprać Łukašenki.
Biełaruski siektar. Fota: Tribuna
«Drama i hańba»
Fanaty «Lehii» 8 listapada vypuścili zajavu pa vynikach matču. U joj jany vykazali abureńnie dziejańniami achovy stadyjona, jakaja prybrała niekatoryja palityčnyja płakaty, vyviešanyja biełarusami. Tyja vykarystali matč, kab vystupić suprać režymu Łukašenki, a taksama nahadać pra represii i palitviaźniaŭ u Biełarusi.
«Jość temy, jakija pavinny być vyšej za padzieły — naprykład, baraćba za takija fundamientalnyja kaštoŭnaści, jak svaboda słova, vyjaŭlenaja haściami na stadyjonie ŭ Polščy, tamu što doma za takija transparanty ich adpravili b u kałoniju», — napisali polskija fanaty.
Dziejańni achovy jany nazvali «dramaj i hańbaj».
Płakat z žančynaj u čyrvona-zialonym źjaviŭsia na matčy čempijanatu Biełarusi ŭ Mazyry
«Ty ździejśniła sapraŭdny ŭčynak». «Dynama» zapisała VIDEA z padziakaj žančynie ŭ čyrvona-zialonym
Chto taja adzinaja žančyna, što pryjšła na matč «Dynama-Minsk» u Varšavie z čyrvona-zialonym ściaham