Rybak z Rahačova złaviŭ u Dniapry «dahistaryčnaha ščupaka»
Jaŭhien pakazaŭ ščupaka, jakoha vyciahnuŭ u starym rečyščy Dniapra: vaha rybiny — 14 kiłahramaŭ, daŭžynia — 1,2 mietra, piša Onliner.by.
06.11.2024 / 10:12
Miarkujučy pa Instagram biełarusa, da takoj zdabyčy jon išoŭ doŭha i ciarpliva: ź siaredziny leta Jaŭhien rehularna vykładvaŭ fota sa ščupakami mienšymi.
«Voś heta krakadziły!» — zachoplena pisali jamu ŭžo tady, ale rybak zapeŭnivaŭ kamientataraŭ, što heta nie miaža, i mieŭ racyju.
«Vyrašyŭ pajechać na «stary» Dniapro biez matora i rechałota, pa-staromu.
U vyniku atrymałasia abchitryć staražytnuju toŭstuju prababulu. Ščupak byŭ adpuščany», — dzielicca padrabiaznaściami mužčyna.
Ščupak Jaŭhiena chaj i nie rekordny dla Biełarusi, ale ŭ trojku samych bujnych ź viadomych dakładna traplaje. Samaha vialikaha na dadzieny momant ščupaka złavili ŭ Słaŭharadskim rajonie na race Sož: jaho dakładnaja vaha skłała 19 kiłahramaŭ 460 hramaŭ.