Rasijski źniščalnik piataha pakaleńnia Su-57 vyśmiejali ŭ kitajskich sacsietkach
Samy sučasny źniščalnik VKS Rasii Su-57 (pa kłasifikacyi NATA — Felon) u paniadziełak prybyŭ u Kitaj napiaredadni 15-j Kitajskaj mižnarodnaj avijacyjna-kaśmičnaj vystavy. Zamiest taho, kab stać zorkaj vystavy, źniščalnik užo padvierhsia krytycy i kpinam u kitajskich sacyjalnych sietkach.
05.11.2024 / 15:23
Rasijski źniščalnik «Stełs» Su-57 prybyŭ na 15-ju Kitajskuju mižnarodnuju avijacyjna-kaśmičnuju vystavu. Fota: VCG/VCG via Getty Images
Jak piša Forbes, samy sučasny źniščalnik Vajenna-kaśmičnych sił Rasii Su-57 (pa kłasifikacyi NATA — Felon) u paniadziełak prybyŭ u Kitaj dla ŭdziełu ŭ 15-j Kitajskaj mižnarodnaj avijacyjna-kaśmičnaj vystavie. Jana pačniecca 12 listapada ŭ horadzie Čžuchaj pravincyi Huandun.
Su-57 budzie ŭpieršyniu pradstaŭleny na avijasałonie, jaki prachodzić raz u dva hady i staŭ najbujniejšaj kitajskaj mižnarodnaj vystavaj, što ŭ apošnija hady vykarystoŭvajecca dla demanstracyi vialikaha praryvu Piekina ŭ halinie vajennaj avijacyi.
Płanujecca, što Su-57, jaki Kreml rekłamuje jak samy sučasny «stełs-źniščalnik piataha pakaleńnia», što znachodzicca siońnia na ŭzbrajeńni, zrobić demanstratyŭnyja paloty, a druhi ekzemplar budzie vystaŭlena ŭ jakaści statyčnaj ekspazicyi.
Jak zaŭvažaje aŭtar artykuła, zamiest taho, kab stać zorkaj vystavy, źniščalnik rasijskaj vytvorčaści ŭžo padvierhsia krytycy i kpinam u kitajskich sacyjalnych sietkach. Vystava jašče navat nie pačałasia, a fatahrafii samalota ŭžo šyroka raspaŭsiudzilisia ŭ TikTok i inšych sacyjalnych sietkach.
Karystalniki chutka praviali paraŭnańni pamiž Su-57 i kitajskim źniščalnikam piataha pakaleńnia Chengdu J-20 Mighty Dragon. I jany nie na karyść rasijskamu.
Mahčyma, zaŭvažaje aŭtar, zbolšaha heta źviazana z tym, što Kreml vyrašyŭ adpravić pratatyp Su-57, a nie sieryjnuju madel. Ale amatary avijacyi chutka ŭkazali na šmatlikija prablemy z dyzajnam i inšyja vidavočnyja niedachopy. Da ich adnosiacca šmatlikija bałty na fiuzielažy i drenna vyvieranyja siekcyi.
Aŭtar ličyć, što Rasija nie zmahła ŭtrymać hledačoŭ na biaśpiečnaj adlehłaści ad samalota, dazvoliŭšy im zapisvać toje, što adbyvajecca, i dzialicca videa ŭ sacyjalnych sietkach. Takim čynam Kreml vypuściŭ mahčymaść kantralavać padaču infarmacyi, chacia moh by dziejničać na apiaredžańnie, vypuściŭšy adredahavany videarolik z vyhadnymi momantami (tak zvany «sizzle reel»), kab sfarmiravać patrebnaje ŭsprymańnie.
Zamiest hetaha Rasija pakinuła situacyju adkrytaj dla krytyki, daŭšy karystalnikam sacyjalnych sietak u Kitai lohkuju nahodu dla abmierkavańniaŭ i napadak.
«Kitajskija sacyjalnyja sietki vielmi kitajecentryčnyja. Kraina zaraz raspracoŭvaje ajčynnyja źniščalniki, jakija, na dumku hramadstva, lepšyja za rasijskija», — rastłumačyŭ vydańniu analityk technałahičnaj haliny i sacyjalnych sietak Rodžer Entnier (Roger Entner) z Recon Analytics.
Ciapier, adznačajecca ŭ artykule, Rasii moža być składana zacikavić kitajskuju aŭdytoryju abo znajści zamiežnych pakupnikoŭ, što, pa sutnaści, i było hałoŭnaj metaj udziełu ŭ avijašou. Bolš za toje, kadry, jakija raspaŭsiudžvajucca ŭ internecie, mahli nieznarok pakazać słabyja baki samalota, adkryŭšy śvietu niedachopy, jakija Rasija nie chacieła b afišavać.
Ukraincy ŭpieršyniu udaryli pa najnoŭšym Su-57 — HUR
U Achtubinsku paciarpieli dva najnoŭšyja samaloty Su-57
U Kitai pačali budavać pieršy ŭ śviecie zavod latučych aŭtamabilaŭ