Коласаў някепска правёў свой другі матч у НХЛ, але «Філадэльфія» усё адно прайграла
Беларус выйшаў на пляцоўку ў першым перыядзе пасля траўмы асноўнага брамніка «Флаерз».
03.11.2024 / 00:28
Аляксей Коласаў. Фота: «Філадэльфія»
Беларускі брамнік «Філадэльфіі» Аляксей Коласаў правёў свой другі матч у Нацыянальнай хакейнай лізе. Хатнюю гульню з «Бостанам» ён пачынаў у запасе, аднак ужо на 8-й хвіліне першага перыяду беларусу давялося выйсці на лёд.
Асноўны галкіпер «Флаерз» Самуэль Эрсан, адбіўшы восем з васьмі кідкоў, атрымаў траўму і не змог працягнуць сустрэчу. У гульню пры ліку 0:0 увайшоў Коласаў.
Беларус у выніку правёў на лёдзе 51 хвіліну 25 секундаў, прапусціў дзве шайбы, адбіўшы 20 з 22 кідкоў, гэта значыць нядрэнныя 90,9%. Яшчэ адзін гол «Філадэльфія» прапусціла ў пустыя вароты, калі трэнер вырашыў рызыкнуць у трэцім перыядзе і замяніў Коласава на шостага палявога.
«Флаерз» закінуць «Бостану» не змаглі і прайгралі з лікам 0:3. «Філадэльфія» займае апошняе месца як у сваім дывізіёне, так і ва Усходняй канферэнцыі з 9 ачкамі ў 12 матчах. «Бостан» ідзе на 12-м месцы на Усходзе з 11 баламі.
Нагадаем, Коласаў стаў першым беларускім брамнікам у гісторыі НХЛ.
Коласаў не згуляў матч «Філадэльфіі», а Протас прызнаны другой зоркай
Упершыню беларускі брамнік згуляў у НХЛ. Які вынік?
Гэтай ноччу ўпершыню ў гісторыі НХЛ згуляе беларускі брамнік