Prahramu siamiejnaha kapitału padoŭžyli na piać hadoŭ
30 kastryčnika Alaksandr Łukašenka padoŭžyŭ dziejańnie prahramy siamiejnaha kapitału na nastupnyja piać hadoŭ, z 2025 pa 2029 hod. Zachoŭvajucca i ŭmovy dla pryznačeńnia takich vypłat, paviedamlaje jahonaja pres-słužba.
30.10.2024 / 13:38
Dakumient pašyraje mahčymaści vykarystańnia hrošaj siamiejnaha kapitału dla palapšeńnia žyllovych umoŭ. Dajecca prava daterminovaha vykarystańnia srodkaŭ pry budaŭnictvie žylla niezaležna ad nakiravańnia miascovych orhanaŭ ułady. Taksama ŭ ahulnuju płošču žylla, jakoje naležyć siamji, nie buduć uličvacca pamiaškańni, jakija nie adpaviadajuć sanitarnym i techničnym patrabavańniam.
Akramia taho, praduhledžana mahčymaść daterminovaha vykarystańnia srodkaŭ na nabyćcio doli žyłych pamiaškańniaŭ, kali ŭ siamji ŭžo jość doli ŭ hetych žyłych pamiaškańniach.
Dazvalajecca taksama daterminova vykarystoŭvać srodki siamiejnaha kapitału dla pahašeńnia kredytaŭ, vydadzienych pa dahavorach ab refinansavańni kredytaŭ na budaŭnictva, rekanstrukcyju, nabyćcio žyłych pamiaškańniaŭ, doli (dolaŭ) u pravie ŭłasnaści na ich.
Akramia taho, ukaz upieršyniu zamacoŭvaje pravy dziaciej na žyllo, pabudavanaje abo nabytaje z vykarystańniem srodkaŭ siamiejnaha kapitału, u tym liku ŭ vypadku razvodu baćkoŭ.
Pry vykarystańni siamiejnaha kapitału na adukacyju źjaŭlajecca mahčymaść apłacić navučańnie za nastupny navučalny hod, zaraz heta dazvolena tolki za hety i papiaredni hady. Pašyrajecca taksama śpis srodkaŭ, pryznačanych dla sacyjalnaj reabilitacyi invalidaŭ, jakija možna nabyć z vykarystańniem siamiejnaha kapitału.
Dakumient taksama pradastaŭlaje prava na pryznačeńnie siamiejnaha kapitału zamiežnym hramadzianam i asobam biez hramadzianstva, jakija pastajanna pražyvajuć u Biełarusi, pry ŭmovie atrymańnia imi hramadzianstva nie paźniej adnaho hoda z dnia naradžeńnia (usynaŭleńnia, udačareńnia) treciaha i nastupnych dziaciej.
Na 1 vieraśnia ŭ Biełarusi było adkryta bolš za 140,5 tys. depazitnych rachunkaŭ «Siamiejny kapitał».
Jaho pryznačajuć šmatdzietnym siemjam pry naradžeńni, usynaŭleńni abo ŭdačareńni treciaha ci nastupnaha dziciaci.
Z 1 studzienia suma składaje 31 480 rubloŭ.