На выбарах у Балгарыі лідзіруе праеўрапейскі блок
На пазачарговых парламенцкіх выбарах у Балгарыі лідзіруе правацэнтрысцкая кааліцыя ГЕРБ-СДС з 26,5% галасоў выбаршчыкаў, вынікае са звестак ЦВК пасля апрацоўкі амаль усіх бюлетэняў.
28.10.2024 / 11:50
Бойка Барысаў у цэнтры. Фота: Valentina Petrova / AP
Следам за ГЕРБ-СДС («Грамадзяне за еўрапейскае развіццё Балгарыі» і «Саюз дэмакратычных сіл») размяшчаецца цэнтрысцкі блок партый ПП-ДБ («Працягваем перамены» і «Дэмакратычная Балгарыя»): у яго 14,4% галасоў. Трэцяе месца займае правапапулісцкая прарасійская партыя «Адраджэнне» з 13,5% галасоў. Усяго ў Нацыянальны сход Балгарыі на дадзены момант праходзяць дзевяць партый і аб'яднанняў, паведамляе Расійская служба Радыё Свабода.
Пазачарговыя выбары ў парламент правялі ў Балгарыі пасля таго, як па выніках мінулых выбараў, якія адбыліся ў чэрвені, тройчы не ўдалося сфармаваць урад. Тады пераможцам таксама быў ГЕРБ-СДС.
Перадвыбарныя апытанні паказвалі перамогу правацэнтрысцкай кааліцыі і ўпэўненае траплянне ў парламент сямі партый: вельмі правыя традыцыйна ў апытаннях набіралі менш, чым на саміх выбарах.
Для фарміравання ўрада пераможцу прыйдзецца дамаўляцца з іншымі партыямі. «Перамога ГЕРБ-СДС відавочная. І мы ўзялі на сябе абавязацельства сфармаваць урад»,-заявіў лідэр ГЕРБ Бойка Барысаў, якога плануюць вылучыць на пасаду прэм'ер-міністра. Ён адзначыў, што бачыць патэнцыяльнымі партнёрамі ўсіх, акрамя «Адраджэння» па «чыста ідэалагічных» меркаваннях.
Партыя «Працягваем перамены» раней заяўляла, што не пагодзіцца з кандыдатурай Барысава на прэм'ерскую пасаду праз карупцыйныя скандалы ў мінулым.
У Балгарыі не ўдаецца сфармаваць стабільны ўрад з таго часу, як у 2021 годзе ў выніку буйных антыкарупцыйных пратэстаў спыніў існаванне кабінет на чале з Бойка Барысавым. Цяперашнія парламенцкія выбары сталі сёмымі за тры гады.
Пасля чэрвеньскіх выбараў палітыкам тройчы не ўдавалася сфармаваць кааліцыйны ўрад. Яўка на тых выбарах стала тады рэкордна нізкай: удзельнічалі толькі 34% выбаршчыкаў. На цяперашніх выбарах яўка можа апынуцца яшчэ ніжэйшай.