Ci možna atrymać pravy kiroŭcy, kali byŭ pacyjentam psichaterapieŭta? Nie ŭsio tak prosta
Atrymańnie daviedak ab zdaroŭi dla vadzicielaŭ daŭno pastaŭlena na patok. Adnak časam standartnaja schiema nie pracuje. Vydańnie «Smartpres» vyśvietliła, u jakich situacyjach u vydačy vadzicielskaj daviedki mohuć admović.
27.10.2024 / 12:23
Źvierniešsia da psichaterapieŭta — nie dazvolać vadzić aŭto?
Čytačka Iryna vyrašyła zdać na pravy i sieści za rul u davoli stałym uzroście. Jana pajšła pa standartnym šlachu: aŭtaškoła — paliklinika — miedkamisija. Pytańniaŭ da žančyny nie ŭźnikła.
Adnak u samym kancy miedkamisii joj skazali: daviedku pakul nie vydaduć.
— My zrabili zapyt i vyśvietlili, što vy źviartalisia da psichaterapieŭta, — rastłumačyli ŭ paliklinicy. — Pryniasicie, kali łaska, dakumient, jaki paćviardžaje, što vy nie znachodziciesia na ŭliku.
Psichaterapieŭta Iryna sapraŭdy naviedvała: paśla rodaŭ, jak jana sama adznačaje, «žyćcio dało raskolinu», i ŭ jaje byli ŭsie prykmiety paślarodavaj depresii, što paćvierdziŭ i śpiecyjalist. Hutarki, tabletki («Zvyčajnyja antydepresanty – ich usie pjuć»), a praź niekalki hadoŭ — redkija zvaroty da ŭžo znajomaha śpiecyjalista («Doktar, na mianie tak šmat navaliłasia zaraz!»). Chto viedaŭ, što kłopat ab svaim mientalnym zdaroŭi moža stać prablemaj?
Psichaterapieŭt, ubačyŭšy zapyt z palikliniki śpiecmiedahladaŭ, zakruciŭ hałavoj: nie, niemahčyma, ja takuju daviedku nie dam.
— Na vas ža zavodziłasia kartka, a značyć, vy stajali na ŭliku. I vas nichto ź jaho nie zdymaŭ. Mahu tolki prapanavać pryjści praz hod-paŭtara: tady ja zmahu paćvierdzić, što vy vyjšli ŭ remisiju. A kamisija, mahčyma, razhledzić vaš vypadak indyvidualna i vydaść dopusk.
«Kali nie źviartalisia bolš za hod, kartka sydzie ŭ archiŭ»
Ci pravamiernyja takija admovy? Što pavinna być zapisana ŭ vašaj miedycynskaj kartcy, kab vas pryznali nieprydatnym da kiravańnia aŭtamabilem? «Smartpres» daviedaŭsia ŭ psichaterapieŭta Valeryi Jeŭdakimavaj.
— Situacyja z dopuskam da kiravańnia transpartnymi srodkami spraściłasia ŭ 2022 hodzie: mienavita tady ŭ Biełarusi vyjšła novaja pastanova Ministerstva achovy zdaroŭja, u jakoj udakładnialisia dyjahnazy, pry jakich zabaraniałasia atrymańnie pravoŭ. U asnoŭnym heta samyja ciažkija dyjahnazy i razłady asoby. Takija pacyjenty jakraz i traplajuć na dyspansierny ŭlik, i majuć peŭnyja abmiežavańni ŭ paŭsiadzionnym žyćci, — tłumačyć Valeryja.
Zychodziačy z hetaj pastanovy, u pacyjentaŭ, jakija stajać na ŭliku, adbirajucca pravy kiroŭcy. A voś za ludźmi, jakija źviartajucca da ŭrača-psichaterapieŭta, takoha surjoznaha nazirańnia nie ŭstanaŭlivajecca. Naprykład, kali vy źviarnulisia da psichaterapieŭta 1 raz – i bolš nie pryjšli.
Praz hod vaša miedycynskaja dakumientacyja sydzie ŭ archiŭ. Nichto vas nie budzie šukać, zvanić vam i zaprašać na pryjom. Usio adbyvajecca vyklučna dobraachvotna.
Što da situacyi Iryny: Valeryja śćviardžaje, što admova psichaterapieŭta była nie zusim pravamiernaja.
— Da 2022-ha dyjahnaz «Paślarodavaja depresija» uvachodziŭ u pieralik abmiežavańniaŭ pa kiravańniu, adnak ciapier pa zakonie pacyjenty, jakija nazirajucca ŭ psichaterapieŭtaŭ i jakija nie mieli surjoznych patałohij, mohuć vadzić aŭto. Dla acenki ryzyk, a taksama mahčymych abmiežavańniaŭ moža być sklikana ŭračebna-kansultatyŭnaja kamisija.
Praciah historyi Iryny: daviedku vydali, ale tolki na hod
Paśla admovy ŭ źniaćci z uliku, Iryna źviarnułasia ŭ haradski kliničny psichdyspansier. Tam hieraini patłumačyli: treba iści na UKK, ale rašeńnie ab pryznačeńni kamisii pavinien prymać toj samy psichaterapieŭt, u jakoha žančyna lačyłasia. Jon pa vyniku ŭsio ž pahadziŭsia sabrać kansilium. Ale papiaredziŭ: spačatku treba prajści psichałahičnaje testavańnie (šerah zadač na ŭvahu, łohiku, kancentracyju i h.d.).
Dzień Ch i sama kamisija prajšli dla Iryny spakojna. Daktary paviedamili, što nijakich supraćpakazańniaŭ da kiravańnia jany nie ŭbačyli, zadali niekalki ahulnych pytańniaŭ ab situacyi, jakaja zaachvociła źviarnucca da psichaterapieŭta, i ab žadańni sieści za rul. I vypisali daviedku, praŭda, z abmiežavańniem: terminam na 1 hod i z zabaronaj vadzić śpiecyjalny transpart. Praściej kažučy: praz 12 miesiacaŭ, daviadziecca jašče raz pryjści i paćvierdzić svajo prava na kiravańnie, pakolki, pavodle zaklučeńnia psichaterapieŭta, depresiŭny stan moža viartacca.
Što ŭ vyniku?
Psichaterapieŭt Valeryja Jeŭdakimava zapeŭnivaje: pacyjentam daktaroŭ-psichaterapieŭtaŭ, realnym i patencyjnym, niama sensu turbavacca, što zvarot da śpiecyjalista niehatyŭna adabjecca na ich u dalejšym.
— Ličycca, što lepš iści ŭ pryvatny miedycynski centr — bo jon nie pieradaje nijakich źviestak u dziaržaŭnyja ŭstanovy, i heta supakojvaje. Ale i ŭ dziaržaŭnych ustanovach pracuje ananimny pryjom. Važna pamiatać: ludzi čaściej pakutujuć nie z-za nastupstvaŭ zvarotu pa dapamohu, a z-za taho, što hetuju dapamohu svoječasova nie akazali. I nie treba bajacca źviartacca da psichaterapieŭta.
Pierad pieršym vizitam doktar rekamienduje skłaści śpis pytańniaŭ da śpiecyjalista.
— Naprykład, jaki ŭ mianie dyjahnaz, ci zmahu ja vadzić mašynu, jakija mohuć być pabočnyja efiekty ad lekaŭ, jakija mnie pryznačajuć, na jakija śfiery žyćcia moj stan paŭpłyvaje i h.d. Heta narmalna! Havorka pra vaša zdaroŭje – i vy majecie prava zadavać navat samyja «durnyja» pytańni.