Bratoŭ Mieniendesaŭ, jakija zabili svaich baćkoŭ i znoŭ prasłavilisia dziakujučy sieryjału, mohuć vyzvalić
Zabojstva 30 hadoŭ tamu skałanuła ŭsiu Amieryku.
26.10.2024 / 08:47
Braty Mienendesy ŭ sudzie ŭ 1994 hodzie. Fota: Getty Images
Dvoje bratoŭ, jakich asudzili za zabojstva ich baćkoŭ u miežach spravy, jakaja skałanuła Amieryku bolš za try dziesiacihodździ tamu, na krok nablizilisia da vyzvaleńnia. Akruhovy prakuror Łos-Andželesa Džordž Haskon rekamiendavaŭ sudździ pierahledzieć prysud Eryku i Łajłu Mieniendesam i vyzvalić ich umoŭna-daterminova, bo źjavilisia novyja dokazy, piša Bi-bi-si.
Zabojstva Kici i Chase Mieniendesaŭ u 1989 hodzie ŭ ich asabniaku ŭ Bievierli-Chiłz lahło ŭ asnovu novaha sieryjału Netflix, jaki znoŭ pryciahnuŭ uvahu da hetaj spravy.
Dla taho kab braty vyjšli na volu, z rekamiendacyjaj prakurora pavinien spačatku pahadzicca sudździa, a zatym ich vyzvaleńnie pavinna zaćvierdzić kamisija pa ŭmoŭna-daterminovym vyzvaleńni.
53-hadovy Eryk Mieniendes i 56-hadovy Łajł Mieniendes ciapier adbyvajuć pažyćciovaje źniavoleńnie biez prava ŭmoŭna-daterminovaha vyzvaleńnia ŭ Kalifornii. Jany zabili svaich baćkoŭ 13 strełami, kali tyja hladzieli televizar.
«Ja liču, što braty raśli ŭ nadzvyčaj niezdarovaj atmaśfiery i mocna paciarpieli ad raspusty», — skazaŭ hałoŭny prakuror Łos-Andželesa. Jon dadaŭ, što choć zabojstvu niama apraŭdańnia, jon ličyć, što jany «spłacili svoj doŭh hramadstvu».
Padčas kryminalnych pracesaŭ u 1990-ch hadach prakurory pradstavili bratoŭ jak bahatych dziaciej, jakija mietadyčna płanavali zabojstvy, kab atrymać dostup da majomaści svaich baćkoŭ. U toj ža čas ich advakaty śćviardžali, što braty šmat hadoŭ byli achviarami emacyjnaha, fizičnaha i seksualnaha hvałtu i dziejničali vyklučna z metaj samaabarony.
Haskon zaklikaŭ pierahledzieć prysud Mieniendesam paśla źjaŭleńnia novych dokazaŭ u spravie, źviazanych z zajavami pra seksualny hvałt.
Adzin z hetych dokazaŭ — list ad Eryka Mieniendesa da inšaha člena siamji, datavany 1988 hodam, jaki źmiaščaje detali mahčymaha hvałtu z boku jaho baćki Chase. Inšyja dokazy pastupili ad niepaŭnaletniaha ŭdzielnika puerta-rykanskaha bojz-benda 1980-ch hadoŭ Menudo. Udzielnik hurta śćviardžaŭ, što Chase Mieniendes, jaki na toj čas pracavaŭ vykanaŭčym dyrektaram hukazapisvalnaj kampanii RCA, nakačaŭ jaho narkotykami i zhvałciŭ u siabie doma.
Spravu adkryli paśla taho, jak 20 žniŭnia 1989 hoda braty, jakim tady było 18 i 21 hod, patelefanavali ŭ palicyju i paviedamili, što znajšli cieły svaich baćkoŭ paśla viartańnia dadomu.
Ci vyjduć braty Mieniendesy na volu?
Haskon skazaŭ, što jaho ofis płanuje padać u sud rekamiendacyju ab źmianieńni prysudu ŭ piatnicu. Jana budzie ŭklučać detali i dokazy na karyść bolš miakkaha pakarańnia. Zatym adbudziecca słuchańnie, jakoje pavinna być pryznačana ŭ bližejšyja 30—45 dzion, dzie sudździa abmiarkuje i zasłuchaje arhumienty nakont vyzvaleńnia bratoŭ. Sami jany taksama mohuć prysutničać na hetym słuchańni.
Słuchańnie, vierahodna, vykliča sprečki. Prakuror adznačyŭ, što heta sprava padzialiła jaho ofis, i niekatoryja supracoŭniki mohuć vystupić suprać jaho ŭ sudzie. Prynamsi adzin z členaŭ siamji Mieniendesaŭ, brat Kici Mieniendes Miłtan Andersen, taksama rezka raskrytykavaŭ akruhovaha prakurora za toje, što toj «hulaje ŭ palityku» ŭ hetaj spravie.
Kali kamisija pa ŭmoŭna-daterminovym vyzvaleńni zaćvierdzić vyzvaleńnie bratoŭ, hubiernatar Kalifornii Hevin Ńjusam usio adno moža admović im. U mai 2023 hoda braty Mieniendesy padali chadajnictva, u jakim padrabiazna vykłali novyja dokazy ŭ svajoj spravie i paprasili admianić ich prysudy.
Prakuror abviaściŭ svajo rašeńnie za 12 dzion da taho, jak pavinna adbycca jaho pieravybrańnie, ale jon asprečyŭ, što jaho zaklik da pierahladu prysudaŭ mieŭ palityčny charaktar. Rašeńnie prakurora prakamientavała Kim Kardašjan — jana padziakavała Haskonu ŭ instahramie za «vypraŭleńnie značnaj pamyłki». Pavodle jaje słoŭ, hetaja sprava «padkreślivaje važnaść asprečvańnia rašeńniaŭ i pošuku praŭdy».
Što zrabili braty Mieniendesy? Chase i Kici Mieniendesaŭ znajšli miortvymi ŭ ich asabniaku ŭ Bievierli-Hiłz z ahniastrelnymi ranieńniami ŭ žniŭni 1989 hoda. Ich syny — Eryk i Łajł — patelefanavali ŭ palicyju i paviedamili, što viarnulisia dadomu i znajšli svaich baćkoŭ miortvymi.
Spačatku ŭłady nie padazravali bratoŭ u zabojstvie. U muža i žonki Mieniendesaŭ zrabili 13 strełaŭ z dvuch strelbaŭ, i takaja žorstkaść złačynstva prymusiła ŭłady padumać, što heta było napadzieńnie kryminalnaj hrupoŭki. Ale braty stali pryciahvać uvahu svaimi pavodzinami: jany tracili hrošy na pradmiety raskošy, uklučajučy hadzińniki Rolex, azartnyja hulni i viečarynki.
Da ich vykryćcia pryviało pryznańnie ŭ złačynstvie psichołahu. Dziaŭčyna doktara pieradała ŭładam aŭdyjozapis ich sieansu.
U sakaviku 1990 hoda palicyja vystaviła bratam abvinavačańnie. Jany paŭstali pierad sudom u 1993 hodzie, pryznalisia ŭ zabojstvach, ale śćviardžali, što dziejničali z metaj samaabarony, bo bajalisia, što ich baćki zabjuć ich pieršymi.
Braty raspaviali, što šmat hadoŭ źviedvali emacyjny, fizičny i sieksualny hvałt z boku ich baćki Chase, jaki byŭ viadomym kiraŭnikom u Halivudzie. Łajł i Eryk zaśviedčyli, što kali jany vystupili suprać seksualnaha hvałtu, u ich siamji pačalisia kanflikty, i braty vieryli, što ich baćki płanavali ich zabić.
Členy siamji śviedčyli ab žorstkim abychodžańni, śviedkami jakoha byli braty, ale nichto nie zajaŭlaŭ, što bačyŭ sieksualny hvałt na ŭłasnyja vočy. Prakurory śćviardžali, što ich matyvam zabojstva byli hrošy, a mienavita majomaść baćkoŭ u pamiery 14 miljonaŭ dalaraŭ. Jany pradstavili bratoŭ jak raśpieščanych dziaciej, jakija dumali, što im usio moža syści z ruk.
Padčas pieršaha sudovaha pracesu prysiažnyja nie zdoleli vynieści adnahałosny vierdykt, ale padčas druhoha ŭ 1995 hodzie bratoŭ Mieniendes asudzili za zabojstva pieršaj stupieni na pažyćciovaje źniavoleńnie biez prava daterminovaha vyzvaleńnia.