Jak viaskoŭcy pierarablajuć svaich dvuchkołavych koniej u elektrarovary
Elektrarovary nabyvajuć usio bolšuju papularnaść, ale, niahledziačy na pieravahi, jany pakul jašče nie ŭsim pa kišeni. Zrešty, ŭmielcy chutka saryjentavalisia i paśpiachova «klapajuć» hetyja techničnyja navinki doma sami. Dakładniej, pierarablajuć u «elektra» zvyčajnyja darožnyja rovary, piša sajt «Pieršy».
25.10.2024 / 18:41
Siarhiej, žychar adnoj ź viosak Biarozaŭskaha rajona, pieršy svoj elektrarovar kupiŭ niekalki hadoŭ tamu. Jon acaniŭ jaho vyhody, vyvučyŭ rynak, i vyrašyŭ u hetym hodzie madernizavać dva chatnija zvyčajnyja rovary — svoj i žončyn.
Ciapier jość niamała biełaruskich internet-kram, jakija prapanujuć uvieś kamplekt detalaŭ dla takich rabot. Hałoŭnaje — heta mator-koła — funkcyjanalny elektraruchavik, jaki ŭbudavany ŭ koła elektraviełasipieda. A dla pracy matora, h. zn. jaho siłkavańnia — akumulatarnaja batareja. Siarhiej raskazaŭ «Pieršamu», što jon robić dalej.
«Dyjamietr koła vybiraješ sam, u zaležnaści ad svajho rovara, — raskazvaje Siarhiej. — Mator-koła prosta ŭstaŭlajecca ŭ viłku i prykručvajecca jak zvyčajnaje koła. Adroźnivajecca jano tolki najaŭnaściu matora i bolšaj tryvałaściu. Akumulatar macuješ da ramy abo prosta kładzieš u košyk na ruli abo bahažniku.
Ručki hazu byvajuć troch typaŭ — matacykletnaja, pałavinnaja i kurkovaja. Matacykletnaja — kali krucicca ŭsia ručka całkam, jak u matacykle; pałavinnaja abo na paŭruki — krucicca tolki pałova ručki; kurkovaja — kali sama ručka nie krucicca, a kiravańnie robicca vialikim abo ŭkazalnym palcam. Sabie ja vybraŭ kurkovy typ.
Adzin z elektrarovaraŭ Siarhieja
Niejak vioz na svaim elektrarovary z matacykletnaj ručkaj košyk jajek. Na niejkim hrudku padskočyŭ, ruka reflektorna ścisnuła ručku, rovar irvanuŭ, u vyniku ja ŭpaŭ, a jajki raźbilisia. Tamu kurok biaśpiečniejšy za ŭsio, ciśnieš na jaho adnym palcam, a ruki całkam kantralujuć rul.
Akramia taho, ručki hazu byvajuć z dadatkovymi elemientami — knopkami pieraklučeńnia chutkaściaŭ, uklučeńnia śviatła, sihnału, dysplejami i h. d. — usio heta ŭžo možna padbirać na sajtach u zaležnaści ad taho, čamu addajacie pieravahu.
Što tyčycca mahutnaści matora — 350 Vt dla horada ci dla vioski chopić vam ź liškam. Moj 350-vatny rovar ź miaškom bulby na bahažniku pre jak traktar!
Što pa hrašach?
Nabor koła plus akumulatar na 14 ampier-hadzin abyšoŭsia mnie ŭ 1250 rubloŭ, ź ich koła kaštavała 600 rubloŭ. Usie detali pryvioz kurjer, dastaŭka ŭ viosku kaštuje 15-18 rubloŭ. Kali kuplać hatovy elektrarovar, to kaštuje jon minimum na tysiaču rubloŭ daražej. Viadoma, u im bolš mahutnaja rama, i vyhladaje jon bolš samavita, ale ja całkam zadavoleny svaim samarobnym.
Pry žadańni jaho možna jašče zrabić tańniejšym. Adzin moj znajomy sam sabraŭ batareju z akumulataraŭ dla šurupakruta. Ale tut treba viedać trochi elektryku.
Ja nie zhadaŭ i takuju detal, jak kantroler — heta elektronny błok dla suviazi matora z akumulataram, ale kali vy źviernieciesia ŭ kramu za naboram dla pierarobki rovara, to vam tam padkažuć najbolš prydatny, ci abmiarkujcie hetyja detali sa znajomym elektrykam.
My z žonkaj adjeździli siezon na svaich samarobnych elektrarovarach i ŭ nas tolki stanoŭčyja acenki. Pry žadańni možam jechać na ich jak na zvyčajnych rovarach».