Biełarus u Čechii vyjhraŭ sud u spravie ab admovie ŭ mižnarodnaj abaronie
Hienadziu (imia źmienienaje ź mierkavańniaŭ biaśpieki) uviesnu 2023 hoda Čechija admoviła ŭ mižnarodnaj abaronie. U adkaz mužčyna padaŭ skarhu ŭ sud. Jaje razhlad i sam praces ciahnuŭsia bolš, čym paŭtara hoda. «Biełsat» raspaviadaje, čym jon skončyŭsia.
25.10.2024 / 13:29
Fota: vecteezy.com
«Sud nie razumieje, u suviazi z čym była admova»
«Sud razhledzieŭ, nakolki zakonnym było rašeńnie mihracyjnaj słužby admović mnie ŭ mižnarodnaj abaronie, i ŭ vyniku admianiŭ jaho. Ciapier mihracyjnaja słužba abaviazanaja jaho pierahledzieć. Usia pracedura pavinna być praviedzienaja nanoŭ, pačynajučy ad majho apytańnia i razhladu ŭsich dakumientaŭ, jakija ja pradstaŭlaŭ razam z prašeńniem ab prytułku», — raspaviadaje Hienadź.
Mužčyna nie moža acanić, što stała vyrašalnym u tym, što sud staŭ na jahony bok, adnak kaža, što było bačnaje ździŭleńnie sudździ admovaj mihracyjnaj słužby.
«U kančatkovym rašeńni zaznačajecca, što sud nie razumieje, u suviazi z čym mahła być admova, tamu što sychodziačy z pradstaŭlenych dakumientaŭ jon ličyć, što abarona pavinna być dadzienaja, dadatkovaja — dakładna, a mahčyma i poŭnaja mižnarodnaja», — kaža biełarus.
Jak doŭha čakać novaha rašeńnia mihracyjnaj słužby — nieviadoma, adnak možna spadziavacca, što paśla sudu praces moža być chutčejšym, čym u pieršy raz, kaža Hienadź sa spasyłkaj na svajho advakata. Kali mužčyna znoŭ atrymaje admovu, jon budzie padavać skarhi ŭ Viarchoŭny sud Čechii i ŭ sud Jeŭraźviazu.
«Ale spadziajusia, da hetaha nie dojdzie. Chočacca narešcie rašeńnia i spakojnaha žyćcia. Bo pakul što jano na paŭzie, u čakańni», — zaznačaje naš surazmoŭca.
Čechija paličyła, što ŭ Biełarusi biaśpiečna
Uvieś hety čas, pačynajučy ad padačy prašeńnia ab prytułku, Hienadź žyvie ŭ łahiery dla ŭciekačoŭ. Kaža, što ŭmovy kamfortnyja, akramia taho, płaciać dapamohu. Suma nievialikaja, adnak biełarus ličyć, što hrech skardzicca, bo na ŭsio patrebnaje chapaje, a hałoŭnaje — dach nad hałavoj — jość.
Hienadź moža pracavać u Čechii — praz peŭny čas pražyvańnia na terytoryi krainy ŭ mihracyjnaj słužbie možna atrymać dakumient, jaki daje dazvoł na pracu.
«Adnak šmat jakija pracadaŭcy nie chočuć brać na pracu z hetym časovym dakumientam, i nichto nie moža ich abaviazać, tamu z pracaŭładkavańniem jość prablemy. Pašpartu ŭ mianie niama, tolki paśviedčańnie suiskalnika abarony», — kaža biełarus.
Statystyka padačy biełarusami prašeńniaŭ ab mižnarodnaj abaronie ŭ Čechii z 2019 pa 2023 hady. Krynica: Ofis biełaruskich demakratyčnych siłaŭ u Čechii
Hienadź byŭ vymušany źjechać ź Biełarusi ŭ sakaviku 2021 hoda praz palityčny pieraśled. Niekatory čas mužčyna pražyŭ va Ukrainie, a paśla pačatku poŭnamaštabnaj vajny pierajechaŭ u Čechiju, dzie i paprasiŭ mižnarodnuju abaronu. Ciaham hoda Hienadź čakaŭ razhladu svajoj zajavy, i ŭ sakaviku 2023 hoda atrymaŭ admovu — Čechija prapanavała jamu viarnucca ŭ Biełaruś, bo tam nibyta biaśpiečna.
U Biełarusi Hienadź paciarpieŭ ad paślavybarčych represijaŭ. Jaho niekalki razoŭ zatrymlivali za ŭdzieł u pratesnych akcyjach, źbivali. Spačatku davali «sutki», a potym mužčynam zacikaviŭsia Śledčy kamitet. Tady biełarus i vyrašyŭ źjechać.
Statystyka ŭchvaleńniaŭ i admoŭ prašeńniaŭ biełarusaŭ ab mižnarodnaj abaronie ŭ Čechii z 2019 pa 2023 hady. Krynica: Ofis biełaruskich demakratyčnych siłaŭ u Čechii
Pavodle Ofisa biełaruskich demakratyčnych siłaŭ u Čechii, z 2019 pa 2023 hady 176 biełarusaŭ padali zajavy na mižnarodnuju abaronu ŭ hetaj krainie. Najbolš ich było ŭ 2020 hodzie — 58.
Ź ich za 5 hadoŭ uchvalili 53 zajaŭki, bolšaść — 41 — u 2021 hodzie. U 2023 hodzie tolki 4 biełarusy atrymali mižnarodnuju abaronu ŭ Čechii.
U 29 vypadkach z 2019 hoda Čechija dała biełarusam dadatkovuju abaronu. Było admoŭlena 74 prośbitam. Najbolš admovaŭ — u 2022 i 2023 hadach — pa 23.