У Расіі яшчэ ёсць небяспечныя баявыя сілы, якіх амаль не закранула вайна — топ-генерал НАТА
Камандуючы сіламі НАТА ў Еўропе, амерыканскі генерал Крыстафер Кавалі заявіў, што Расія панесла значныя страты ва Украіне, аднак у яе да гэтага часу ёсць «небяспечныя баявыя сілы», якія амаль не пацярпелі ад вайны. Яго словы перадае Business Insider.
25.10.2024 / 13:15
Фота: Мінабароны РФ
Паводле слоў генерала, размова ідзе аб далёкай авіяцыі, ракетных сілах стратэгічнага прызначэння, абаронных падраздзяленнях і падводных сродках. Кавалі таксама адзначыў, што большая частка тактычнай авіяцыі Расіі яшчэ не ўцягнута ў вайну.
«Таму, нягледзячы на значныя страты ў наземнай сферы, у астатняй ваеннай структуры Расіі застаецца вялікі патэнцыял — як звычайны, так і ядзерны – і таму неабходна мець гэта на ўвазе», — лічыць Кавалі.
Генерал НАТА падкрэсліў, што сухапутныя сілы Расіі панеслі значныя страты ў часе баявых дзеянняў ва Украіне, аднак Масква зрабіла прыкметныя крокі для іх аднаўлення. Ён дадаў, што цяпер ёсць пэўныя праблемы з якасцю, і некаторае абсталяванне можа быць не самым новым, аднак у Расіі ёсць план аднаўлення гэтых сухапутных сіл і разгортвання іх на межах НАТА, а да гэтага Альянсу трэба паставіцца вельмі сур'ёзна.