Minzdaroŭja bje tryvohu — vysokatechnałahičnaje abstalavańnie dla dziciačych chirurhaŭ u krytyčnym stanie
U Ministerstvie achovy zdaroŭja bjuć tryvohu z nahody vysokatechnałahičnaha abstalavańnia dla dziaciej. Pa źviestkach viedamstva, znos jaho nabližajecca da 100%. Pra heta havorycca va ŭnutranaj spravazdačy «Vyniki pracy orhanaŭ i arhanizacyj achovy zdaroŭja ŭ 2023 hodzie», jakuju «Lusterka» atrymała z dapamohaj «Biełpoła».
25.10.2024 / 08:18
Pacyjent RNPC dziciačaj chirurhi. Fota: dhc.by
— Znošanaść vysokaśpiecyjalizavanaha abstalavańnia (zvyš dziesiaci hadoŭ) u ciapierašni čas nabližajecca da 100%, — havorycca ŭ spravazdačy Ministerstva achovy zdaroŭja. — Krytyčnaja situacyja skłałasia z łaparaskapičnym, endaskapičnym abstalavańniem i instrumientami ŭ abłasnych i mižrajonnych balnicach.
Praktyčna ŭsio najaŭnaje ŭ rehijonach endaskapičnaje abstalavańnie (80,5%) — siaredniaha i nizkaha ŭzroŭniu, što nie dazvalaje pravieści paŭnavartasnyja dyjahnastyčnyja daśledavańni i abciažarvaje vyznačeńnie dyjahnazu, asabliva va ŭzrostavaj hrupie da hoda.
Viedamstva kaža, što ŭ krainie jość prablemy i sa śpiecyjalizavanym endaskapičnym abstalavańniem, kab pravodzić kałonaskapiju dzieciam, małodšym za piać-siem hadoŭ, i hnutkuju bronchaskapiju dzieciam da dziesiaci hadoŭ. Tamu z usich bronchaskapij, praviedzienych u krainie ŭ 2023 hodzie, 83% prajšli ŭ RNPC dziciačaj chirurhii i Homielskaj abłasnoj dziciačaj kliničnaj balnicy.
— Za apošnija 30 hadoŭ nie było centralizavanych zakupak endaskapičnaha abstalavańnia dla dziaciej, za apošnija 15 hadoŭ — zakupak śpiecyjalizavanaha łaparaskapičnaha abstalavańnia dla dziaciej, — ahučvaje pryčynu žałasnaha stanu Ministerstva.
U karotkaterminovaj pierśpiektyvie vyrašać prablemu prapanujuć, arhanizavaŭšy centralizavanuju zakupku sučasnaha videaendaskapičnaha abstalavańnia (hnutkaja endaskapija) i łaparaskapičnych instrumientaŭ. U doŭhaterminovaj — kažuć pra nieabchodnaść «sistemnaha padychodu» da zakupak abstalavańnia. Čamu hetyja miery nie raspačali raniej, u spravazdačy nie skazana.
Pa danych Ministerstva achovy zdaroŭja, u Biełarusi chirurhičnaja dapamoha dzieciam akazvajecca ŭ RNPC dziciačaj chirurhii, a taksama ŭ šaści abłasnych i piaci mižrajonnych chirurhičnych adździaleńniach. Taksama ŭ piaci bujnych rajonnych chirurhičnych adździaleńniach dla darosłych jość miescy dla dziaciej. Usiaho na kaniec 2023 hoda ŭ krainie było 669 chirurhičnych łožkaŭ dla dziaciej (uklučajučy 145 u RNPC dziciačaj chirurhii).