Вясковец у полі наткнуўся на шкілет чалавека. Аказалася, памерлы даўно пайшоў на могілкі і не вярнуўся
Для ідэнтыфікацыі памерлага ў Касцюковіцкім раёне чалавека прыйшлося праводзіць генетычную экспертызу.
24.10.2024 / 17:42
Фота: Дзяржкамітэт судовых экспертыз
Жыхар Касцюковіцкага раёна ў канцы ліпеня збіраў ураджай і наткнуўся на чалавечыя парэшткі.
На месцы не знайшлі ніякіх дакументаў або іншых рэчаў, па якіх можна было вызначыць асобу памерлага — толькі абутак і адзенне.
Сілавікі выказалі здагадку, што парэшткі могуць належаць жыхару адной з найбліжэйшых вёсак, які знік без вестак у траўні. Пошукі вяскоўца тады не прынеслі выніку, паведамляе Дзяржкамітэт судовых экспертыз.
Судовыя эксперты правялі генетычную экспертызу па выяўленых парэштках і біялагічных узорах родных братоў зніклага. Яна пацвердзіла, што парэшткі належаць 49-гадоваму мясцоваму жыхару.
Ён знік яшчэ ў траўні. Па словах сваякоў, мужчына пайшоў на могілкі наведаць магілы бацькоў, але дадому не вярнуўся.
Эксперты не знайшлі прыкмет гвалтоўнай смерці.