Pavieł Łatuška bačyć pryčynu pryznačeńnia vybaraŭ na studzień u inšym
Palityk vykazvaje zdahadku, što tak treba ŭ intaresach Rasii.
24.10.2024 / 17:07
Kiraŭnik Narodnaha antykryzisnaha ŭpraŭleńnia Pavieł Łatuška nie zhodny z raspaŭsiudžanym mierkavańniem ab tym, što adna z pryčyn rańniaha praviadzieńnia prezidenckich vybaraŭ — słaboje zdaroŭje dyktatara. Svaje dumki jon ahučyŭ u efiry prahramy «Obyčnoje utro»
«Zdaroŭje — heta toje, što nie adyhryvała ŭ dadzienym vypadku nijakaj roli. Heta śmiešna z punktu hledžańnia hadoŭ, na jakija jon płanuje dalej kiravać. Heta śmiešna z punktu hledžańnia taho, što Łukašenka ŭ pryncypie maje svajo žadańnie kiravać da apošniaha dnia svajho žyćcia.
Heta toj čałaviek, jaki fanatyčna lubić tolki adnu reč u hetym žyćci — heta ŭłada. Nie Kolu, a tolki ŭładu», — vykazaŭ svajo mierkavańnie Łatuška.
«Pasprabuju dapuścić, što, mahčyma, heta realizacyja peŭnych vajenna-stratehičnych met u intaresach Rasijskaj Fiederacyi, jakija treba budzie realizavać mienavita ŭ kancy zimy ci viasnoj nastupnaha hoda», — vykazvaje svaju zdahadku Łatuška.
«Razmova idzie pra toje, što Rasija zacikaŭlena ŭ hetaj ahresii pieramahčy. Pieramahčy prynamsi ŭ formie fiksacyi za saboj tych terytoryj, jakija jany ŭpisali ŭ kanstytucyju Rasijskaj Fiederacyi ŭ 2022 hodzie. I «bałkon» — stratehičny vystup Biełaruś — dla hetaha źjaŭlajecca krytyčna važnym. (…) Pa-druhoje, heta moža dazvolić ruskim dasiahnuć hetaj mety mienšaj kolkaściu achviar, zatrat i resursaŭ. Tamu viartańnie temy «biełaruskaha bałkona» absalutna realna».
Pavieł Łatuška źviartaje ŭvahu jašče na adzin momant: u toj dzień, jak byli abvieščany vybary, jakija faktyčna daterminovyja, było abvieščana ab praviadzieńni vučeńniaŭ «Zachad — 2025». Jon ličyć heta nievypadkovym. Pakul data praviadzieńnia vučeńniaŭ nieviadomaja.
«Jość dva varyjanty. Ci Łukašenka faktyčna pad kantrolem rasijskich uzbrojenych sił, atrymaŭšy adpaviednuju padtrymku biaśpieki ź ich boku, praviadzie svaju sprobu pryznačeńnia na ŭzurpiravanuju im pasadu prezidenta Respubliki Biełaruś. Ci ŭ nastupnym, paśla pierapryznačeńnia, jon zabiaśpiečyć u intaresach Rasijskaj Fiederacyi znoŭ infrastrukturu, terytoryju dla rašeńnia vajennych zadač.
Heta moža być kancentracyja peŭnaha vajskovaha kantynhientu, hrupoŭki vojsk, jakaja stvaraje pahrozu jak na ŭkrainskim napramku, tak i na zachodnim napramku. Mahčyma, heta łakalny kanflikt na miažy. Naŭrad ci ja b dapuskaŭ niejkuju ahresiju, ale sam fakt najaŭnaści bujnoj hrupoŭki abaviaža, prymusić ukrainski bok častku surjoznych sił i reziervaŭ, jakich nie chapaje, (…) padciahnuć da miažy. I heta hałoŭnaja pryčyna, nijakaje nie zdaroŭje», — ličyć palityk.
Druhaja pryčyna, jakaja, pavodle Łatuški, adyhrała rolu ŭ pryniaćci rašeńnia pravieści vybary ŭ studzieni, — toje, što Łukašenka «baicca leta».
«Jon baicca paŭtoru padziej 2020 hoda, tamu jon robić heta zimoj. Zaŭvažcie, što heta robicca faktyčna na vadochryščanskija śviaty. (…) Heta najbolš pasiŭny pieryjad, šery pieryjad, kali ludzi nie schilnyja da niejkich aktyŭnych dziejańniaŭ. I heta psichałahična było aceniena i vybrana mienavita hetaja data jak najbolš adpaviednaja z punktu hledžańnia zabieśpiačeńnia biaśpieki ŭnutranych pracesaŭ».
Pavieł Łatuška adznačyŭ, što fakt pryznačeńnia prezidenckich vybaraŭ u taki čas demanstruje, što Łukašenka «baicca apazicyi».
Ad imia «Biełaj Rusi» rassyłajucca listy ab vyłučeńni Kačanavaj u prezidenty
«Panios takuju łuchtu, što navat ja ździviŭsia». Kizim prakamientavaŭ zajavy Łukašenki
CVK patłumačyŭ, čamu 23 lutaha nie abrali dniom vybaraŭ
Kaho Łukašenka pastavić na vybary kandydatami-spojlerami?