Turcyja zabłakavała pastaŭki amierykanskaj elektroniki rasijskamu VPK
Turcyja biez aficyjnaha abviaščeńnia zabaraniła svaim eksparcioram pierapraŭlać u Rasiju amierykanskuju pradukcyju vajskovaha pryznačeńnia. Heta adbyłosia paśla taho, jak Vašynhton pryhraziŭ Ankary, jakaja nie dałučyłasia da zachodnich sankcyj i imkniecca zachoŭvać niejtralitet u rasijska-ŭkrainskim kanflikcie, «nastupstvami» za padtrymku rasijskaha VPK, piša The Moscow Times.
22.10.2024 / 20:23
Prezident Turcyi Redžep Taip Erdahan. Fota: Mikhail Klimentyev, Sputnik, Kremlin Pool Photo via AP
U apošnija tydni tureckija ŭłady ŭnieśli źmieny ŭ nacyjanalnuju elektronnuju mytnuju sistemu, raskazali Financial Times try čałavieki, jakija majuć pra heta niepasrednuju infarmacyju. Ciapier eksparcioram budzie zabaroniena pastaŭlać u Rasiju amierykanskuju pradukcyju, uklučanuju ŭ śpis z 50 «vysokapryarytetnych» tavaraŭ, jakija ZŠA, ES, Vialikabrytanija i Japonija vyznačyli jak krytyčna važnyja dla rasijskaj vajskovaj pramysłovaści.
U ich liku pieradavaja elektronika, uklučajučy pracesary i karty pamiaci, jakija vykarystoŭvajucca ŭ rakietach i dronach, sistemy dystancyjnaha kiravańnia, stanki i inšaje abstalavańnie, jakoje ŭžyvajecca pry vytvorčaści ŭzbrajeńniaŭ.
Pastaŭka anałahičnych tavaraŭ ź ES była zabłakavanaja raniej, raskazali dźvie krynicy FT. Sa słoŭ adnoj z krynic, publična pra ŭviedzienyja abmiežavańni nie paviedamlajecca, bo heta «palityčna adčuvalnaje» pytańnie.
Administracyja Džo Bajdena prykłała značnyja namahańni, kab spynić pastaŭki ŭ Rasiju praz Turcyju pradukcyi, jakaja vykarystoŭvajecca dla vypusku ŭzbrajeńniaŭ. U žniŭni z tureckimi čynoŭnikami i top-mieniedžarami ŭ Ankary i Stambule sustrakaŭsia pamočnik ministra handlu ZŠA Mećju Aksiełrod, jaki imkniecca nie dapuścić traplańnia pieradavych amierykanskich technałohij praciŭnikam ZŠA.
Aksiełrod papiaredziŭ pradstaŭnikoŭ Turcyi pra niepryjemnyja «nastupstvy», kali jana nie zabłakuje pastaŭku takoj pradukcyi ŭ Rasiju.
«My ličym, što turecki ŭrad pačuŭ našy aściarohi i razumieje ich, — paviedamiŭ Aksiełrod u adkaz na zapyt FT. — My nie biez padstaŭ ličym, što supracoŭnictva budzie ŭmacoŭvacca».
Pastaŭki zachodniaj pradukcyi ŭ Rasiju praz Turcyju ŭžo mocna skaracilisia paśla taho, jak ZŠA ŭ śniežni 2023 hoda abviaścili pra mahčymaść uviadzieńnia druhasnych sankcyj suprać bankaŭ inšych krain, jakija absłuhoŭvajuć ździełki z padsankcyjnymi tavarami. U vyniku tureckija banki stali admaŭlacca ad praviadzieńnia padobnych tranzakcyj.
Da pačatku vajny va Ukrainie miesiačny ekspart vysokapryjarytetnych tavaraŭ z Turcyi ŭ Rasiju składaŭ tolki kala $3 młn u miesiac, ale da śniežnia 2022 hoda jon uźlacieŭ da $37,6 młn, zhodna z tureckaj statystykaj. Niezadoŭha da abviaščeńnia pra druhasnyja sankcyi ZŠA jon byŭ $26,5 młn, a ŭ lipieni 2024 hoda — užo tolki $4,5 młn.
Hałoŭnym pieravałačnym punktam pa-raniejšamu zastajecca Kitaj (uklučajučy Hankonh). Jany ŭ minułym lipieni pradali Rasii pradukcyi vajskovaha pryznačeńnia na $377,7 młn, pavodle danych Trade Data Monitor, pryčym u śniežni 2023 hoda hety pakazčyk pieravyšaŭ $680 młn.
Turcyja śledam za Rasijaj zabłakavała Discord
Rasiju zapadozryli ŭ maštabnaj falsifikacyi ekanamičnaj statystyki