Byłoha karala chip-chopu P. Diddy usio bolš mužčyn abvinavačvajuć u seksualnym hvałcie
Siarod novych iskaŭ suprać amierykanskaha repiera i muzyčnaha pradziusara — vosiem ananimnych mužčyn, jakija raskazvajuć pra vypadki seksualnaha hvałtu suprać ich u pieryjad z 1998 pa 2022 hod. Samamu małodšamu na momant ździajśnieńnia złačynstva było 16 hadoŭ.
22.10.2024 / 14:19
Šon Džon Kombs. Fota: Shareif Ziyadat / Getty Images
Pra padrabiaznaści spravy suprać amierykanskaha repiera i muzyčnaha pradziusara Šona Džona Kombsa, viadomaha jak P. Diddy, paviedamlaje The Washington Post.
Jak viadoma, były karol chip-chopu byŭ zatrymany 16 vieraśnia pa abvinavačańni ŭ handli ludźmi z metaj seksualnaj ekspłuatacyi, raspaŭsiudžvańni narkotykaŭ i vykradańni ludziej. Mnohija z hetych mierkavanych złačynstvaŭ adbylisia na seks-viečarynkach.
Jak piša vydańnie, tolki z 14 kastryčnika suprać byłoha karala chip-chopu było padadziena 13 novych iskaŭ. Adzin ź ich ad žančyny, jakaja śćviardžaje, što ŭ 13 hadoŭ padvierhłasia napadu na viečaryncy MTV Video Music Awards u 2000-m. Jana śćviardžaje, što Kombs razam ź nienazvanym mužčynam i žančynaj-znakamitaściu zhvałcili jaje.
Vosiem pazovaŭ padali mužčyny. Ź ich dvoje śćviardžajuć, što byli niepaŭnaletnimi na momant ździajśnieńnia napadaŭ. Mnohija abvinavaŭcy raniej pracavali z Kombsam abo dla jaho.
Uvohule za apošni hod suprać Kombsa było padadziena 25 iskaŭ ab seksualnym hvałcie. Siarod pieršych 12 abvinavaŭcaŭ dvoje byli mužčynami. Heta Rodni «Lil Rod» Džons, pradziusar, jaki pracavaŭ nad apošnim prajektam Kombsa — The Love Album 2023 hoda, i Deryk Li Kardeła-Śmit, źniavoleny turmy Mičyhana.
Siarod novych iskaŭ — abvinavačańnie ad mužčyny, jaki śćviardžaje, što ŭ 1998 hodzie byŭ zaprošany na «Biełuju viečarynku» (štohadovaje zornaje mierapryjemstva, jakoje Kombs arhanizoŭvaŭ z 1998 pa 2009 hod). Pavodle sudovych dakumientaŭ, Kombs pierakanaŭ 16-hadovaha padletka, muzyku-pačatkoŭca, źniać štany, zajaviŭšy, što heta abrad paśviačeńnia ŭ industryju, a zatym pačaŭ łaščyć jaho hienitalii.
Inšy zajaŭnik śćviardžaje, što jamu było 17 hadoŭ, kali jaho zaprasili na ekskluziŭnuju viečarynku, arhanizavanuju Kombsam u pientchausie hatela na Manchetenie ŭ 2022 hodzie. P. Diddy prapanavaŭ padletku napoj, ad jakoha ŭ taho zakružyłasia hałava i jon adčuŭ słabaść. Chłopiec sprabavaŭ znajści prybiralniu i natyknuŭsia na pakoj, dzie prachodziła orhija. Tam Kombs pryciahnuŭ jaho da łožka i pačaŭ damahacca.
Akramia taho, u pazovach apisany vypadki, kali damahańni Kombsa da mužčyn byli pierapynieny. Naprykład, adzin z mužčyn, jaki pracavaŭ achoŭnikam na viečaryncy Kombsa ŭ 2005 hodzie, zajaviŭ, što damahańni spynilisia, kali ŭ pakoj uvajšła jahonaja žonka. Inšy mužčyna, jaki davaŭ Kombsu ŭ arendu raskošnyja aŭtamabili i ŭpryhožvańni, śćviardžaje, što karol chip-chopu damahaŭsia jaho na viečaryncy ŭ 2022 hodzie i incydent byŭ pierapynieny, kali ŭ pakoj uvajšoŭ viadomy spartsmien.
Niekatoryja mužčyny zajaŭlajuć, što ich nie tolki damahalisia, ale i hvałcili. Adzin ź incydentaŭ, apisany ŭ pazovie, adbyŭsia na viečaryncy ŭ 2022 hodzie ŭ Łos-Andželesie. Paciarpieły — trenier pa fitnesie, jaki śćviardžaje, što jaho apaili i vymusili ŭdzielničać u seksualnych aktach z Kombsam i inšymi viadomymi asobami.
Kombs, jaki ŭ ciapierašni čas znachodzicca ŭ fiederalnaj turmie ŭ Bruklinie ŭ čakańni suda, praciahvaje admaŭlać svaju vinu. U niadzielu, 20 kastryčnika, jaho advakaty paprasili sudździu Ńju-Jorka zabaranić lubym patencyjnym śviedkam abo ich advakatam vykazvacca suprać ich klijenta, śćviardžajučy, što takija zajavy pieraškadžajuć spraviadlivamu sudovamu razboru.
Pa pradjaŭlenych abvinavačańniach Kombsu pahražaje pakarańnie ad 15 hadoŭ da pažyćciovaha zaniavoleńnia. Sud pavinien adbycca ŭ mai 2025 hoda.
Seksualny skandał vakoł byłoha karala chip-chopu P. Diddy
Amierykanski repier straciŭ prytomnaść i pamior na scenie prosta padčas vystupu
Forbes apublikavaŭ rejtynh samych vysokaapłatnych znakamitaściaŭ: vyniki dosyć niečakanyja
Šviedskaja zorka chip-chopa ź minskaha padjezda. Chto taki Yung Lean