1xBet ładzić tysiačy fiktyŭnych matčaŭ, u tym liku ŭ Biełarusi. Na ich zarablajucca kaśmičnyja sumy
Bukmiekierskaja kantora 1xBet arhanizoŭvaje vielizarnuju kolkaść fiktyŭnych matčaŭ pa roznych vidach sportu, u jakuju za hrošy ŭciahvajucca nieprafiesijnyja hulcy i navat maleńkija dzieci. Hetyja matčy ładziacca 24/7 u zakrytych pamiaškańniach biez hledačoŭ, ludziej apranajuć u formy viadomych kamand śvietu, i dziakujučy staŭkam zarablajuć na ich hihanckija sumy hrošaj. U jakaści placovak dla matčaŭ vykarystoŭvajuć u tym liku biełaruskija spartyŭnyja abjekty.
23.10.2024 / 10:05
Kadry z tranślacyj skandalnaha bukmiekiera 1xBet, padčas jakich robiacca staŭki na fiktyŭnych amatarskich hulniach pa roznych vidach sportu. Fota: Bellingcat / Josimar
Sumiesnaje rasśledavańnie prajekta Bellingcat i płatformy spartyŭnych rasśledavańniaŭ Josimar vykryła detali maštabnaj afiery.
Amatarskija turniry 1xBet tranślujucca va ŭsim śviecie, u ich vykarystoŭvajucca hulcy z Rasii, Biełarusi i Ukrainy, u tym liku maleńkija dzieci.
Vielizarnuju papularnaść na tranślacyjach nielehalnych amatarskich hulniaŭ maje tak zvany karotki futboł, jaki ŭklučaje kamandy z dvuch da piaci hulcoŭ z kožnaha boku i doŭžycca ad dziesiaci da dvanaccaci chvilin. Kali matč kančajecca, hulcy źmianiajuć majki i pačynajuć novuju hulniu na adnym z susiednich paloŭ, jakija adździelenyja mž saboju zasłonami. Takim čynam, «Arsienał» moža pieratvarycca ŭ «Amsterdam» abo «Dortmund». Hałoŭnaje toje, što dziejańnie idzie bieśpierapynna, i zaŭsiody jość hulnia, na jakuju možna zrabić staŭku, jak dniom, tak i nočču.
Staŭki na padobnyja matčy i turniry prymajuć usie bukmiekiery, ale ŭ hetym vypadku idzie havorka pra arhanizacyju padobnych spabornictvaŭ kantorami z metaj pavyšeńnia ŭłasnych zarobkaŭ.
Adny i tyja ž hulcy ŭ majkach roznych suśvietna viadomych futbolnych kamand hulajuć na bieśpierapynnych nielehalnych amatarskich matčach, jakija ładziacca bukmiekieram 1xBet. Foty: Bellingcat / Josimar
U nielehalnych matčach pa karotkim futbole možna taksama pabačyć takija kamandy, jak «Livierpul», «Reał Madryd», «Barsiełona» i inšyja. Hulcoŭ apranajuć u formy hetych suśvietna viadomych kamand dla lepšych prahladaŭ i vysokaha dachodu na staŭkach. Pry hetym 1xBet — hłabalny partnior FK «Barsiełona», a taksama PSŽ, «Alimpik Lil», Sieryi A i Afrykanskaj futbolnaj kanfiederacyi (CAF).
Taksama hulcoŭ apranajuć u formy nieisnujučych kamand, dajučy im fiktyŭnyja nazvy i prydumlajučy novyja falšyvyja lihi.
Za ŭdzieł u takich hulniach, pavodle Bellingcat i Josimar, ludzi atrymlivajuć hrošy (adnak nieviadoma, ci atrymlivajuć hrošy absalutna ŭsie hulcy). Adzin z udzielnikaŭ karotkaha futboła, ź jakim pahutaryli rasśledavalniki, zajaviŭ, što kožny dzień kožnaha tydnia za 5-hadzinnuju źmienu adhulvaje mnostva matčaŭ za roznyja kamandy. Pa słovach hulca, źmieny mianiajucca ŭvieś čas, hulni ładziacca ŭ tym liku pa načach, i «niekatoryja ŭdzielniki nie vyłaziać ź placovak dniami», bo im patrebnyja hrošy.
Mužčyna śćviardžaje, što zarablaŭ za hod bolš, čym siaredni doktar u Rasii (siaredni zarobak rasijskaha doktara ŭ miesiac składaje kala 80 tysiač rasijskich rubloŭ — heta 3000 biełaruskich rubloŭ).
Nielehalnyja fiktyŭnyja matčy pa karotkim futbole, jakija ładziacca nielehalnym bukmiekieram 1xBet
Analiz Bellingcat pakazaŭ, što na sajcie 1xBet u vieraśni na praciahu 24 hadzin u žyvym efiry tranślavalisia 1297 matčaŭ amatarskaha karotkaha futboła. Dla paraŭnańnia, niamieckaja Bundeśliha, anhlijskaja Premjer-liha i ispanskaja Ła Liha pravodziać usie razam 1066 hulniaŭ za ŭvieś siezon.
1xBet ładzić amatarskija fiktyŭnyja hulni kožny dzień, ich tranślacyja idzie niaspynna i ich hladziać ad 5 miljonaŭ hledačoŭ štomiesiac. Heta značyć, što kolkaść amatarskich futbolnych matčaŭ, jakija tranślujucca na hetym sajcie kožny hod, składzie amal paŭmiljona. I heta tolki havorka pra karotki futboł.
Afiera 1xBet była realizavanaja ŭ pramysłovych maštabach. Bukmiekier tranśluje videa z roznych miescaŭ, dzie taksama ładziacca nieprafiesijnyja turniry pa baskietbole, valejbole, fłorbole, chakiei, tenisie, nastolnym tenisie i hetak dalej. Jość i absurdnyja vidy sportu, naprykład «Subsoccer» (taksama viadomy jak «futboł na łaŭcy»), dzie dva hulcy sprabujuć zabić miač u maleńkuju kletku ź sietki, siedziačy na łaŭkach amal pobač adzin z adnym.
Kadr z tranślacyi «Subsoccer» na sajcie 1xBet
Usie nielehalnyja amatarskija matčy pravodziacca na składskich pamiaškańniach i pieraabstalavanych arenach, častka ź jakich padobnyja da dekaracyj z telesieryjała «Hulnia ŭ kalmara», adznačajuć prajekty Bellingcat i Josimar.
Dahetul było nieviadoma, dzie mienavita ładziacca hetyja karotkija matčy, i sam 1xBet nikoli nie raskryvaŭ hetaha, rehularna praviarajučy niekatorych hulcoŭ na detektary chłuśni z namieram vyśvietlić, ci raspaviadali tyja kamu-niebudź charaktar ich zaniataści i miescy praviadzieńnia hulniaŭ.
Adnak žurnalisty zdoleli vyličyć miesca znachodžańnia niekalkich placovak, i častka ź ich znachodzicca ŭ Biełarusi. Tak, 1xBet ładzić zakrytyja fiktyŭnyja tenisnyja spabornictvy pad ehidaj «Daily Aqua Tour» u pryvatnaj tenisnaj akademii Avante Club u Minsku i arhanizoŭvaje nielehalnyja baskietbolnyja matčy na placoŭkach dziaržaŭnaha spartyŭnaha kompleksu «Alimpijec» u Mahilovie, jaki słužyć bazaj dla Mahiloŭskaha abłasnoha centra alimpijskaha reziervu pa lohkaj atletycy (pryčym hetyja baskietbolnyja matčy ładziacca fiktyŭnymi kamandami ŭ ramkach tak zvanaj «Biełaruskaj niabiesnaj lihi», jakoj u krainie aficyjna nie isnuje).
Ni Avante Club, ni Mahiloŭski abłasny centr alimpijskaha reziervu pa lohkaj atletycy nie adkazali na zapyty prajektaŭ Bellingcat i Josimar dać kamientar pa situacyi.
Charakterna, što sam bukmiekier 1xBet aficyjna prypyniŭ dziejnaść u Biełarusi i pierastaŭ absłuhoŭvać biełaruskich klijentaŭ, zabaraniajučy im rabić staŭki, stvarać depazity i vyvodzić srodki.
Zakrytyja fiktyŭnyja tenisnyja spabornictvy dla 1xBet ładziacca na bazie tenisnaj akademii Avante Club u Minsku. Skrynšot rasśledavańnia Bellingcat / Josimar
Zakrytyja fiktyŭnyja baskietbolnyja spabornictvy dla 1xBet ładziacca na bazie dziaržaŭnaha spartyŭnaha kompleksu «Alimpijec» u Mahilovie. Skrynšot tranślacyi 1xBet z rasśledavańnia Bellingcat / Josimar
U Rasii, dzie 1xBet aficyjna zabaronieny i pieraśledujecca za parušeńni zakonaŭ, bukmiekier taksama ładzić mnostva nielehalnych matčaŭ. Tak, žurnalisty-rasśledavalniki vyličyli, što padpolnyja hulni 1xBet rehularna ładziacca:
- na stadyjonie «Mardovija Arena» (adzin z samych vialikich stadyjonaŭ Rasii, jaki budavaŭsia śpiecyjalna pad čempijanat śvietu pa futbole — 2018),
- na bazie prafiesijnaj futbolnaj škoły imia Alaksandra Ściopina ŭ Bransku, jakaja supracoŭničaje z kirujučaj rasijskaj partyjaj «Adzinaja Rasija» i enierhietyčnaj dziaržkarparacyjaj Hazpram,
- na stadyjonie «Biełamorac» na bazie kompleksu fizičnaj kultury i adpačynku «Zoračka» ŭ Sievieradźvinsku.
U pieraličanych vyšej miescach u fiktyŭnyja hulni 1xBet taksama ŭciahvajucca dzieci ad 14 da 16 hadoŭ (jak chłopčyki, tak i dziaŭčatki), a taksama ładziacca dziciačyja vajskova-patryjatyčnyja mierapryjemstvy, dzie navučajuć karystacca zbrojaj, paviedamlajuć prajekty Bellingcat i Josimar.
Fiktyŭny matč pa baskietbole na stadyjonie «Mardovija Arena» za 15 kastryčnika 2024 hoda (źvierchu). Vajskova-patryjatyčnaje mierapryjemstva sa zbrojaj na toj ža «Mardovija Arenie» (źnizu). Foty: Bellingcat / Josimar
Fiktyŭny matč pa karotkim futbole na bazie prafiesijnaj futbolnaj škoły imia Alaksandra Ściopina ŭ Bransku (źvierchu). Vajskova-patryjatyčnaje mierapryjemstva z tymi ž dziećmi (źnizu). Foty: Bellingcat / Josimar
Fiktyŭny matč 1xBet pa fłorbołu na stadyjonie «Biełamorac» u Sievieradźvinsku, u jaki ŭciahnuli dziaŭčatak uzrostam 14-15 hadoŭ. Kadr z tranślacyi 1xBet za vierasień 2024.
Rasśledavalniki znajšli taksama adno miesca dla nielehalnych hulniaŭ 1xBet va Ukrainie, dzie bukmiekier byŭ aficyjna zabaronieny paśla pačatku rasijskaha ŭvarvańnia. Adnak fiktyŭnyja matčy pa baskietbole dahetul ładziacca na Svoi Arena ŭ Kijevie.
Kiraŭnictva Svoi Arena, adkazvajučy na zapyt prajektaŭ Bellingcat i Josimar, zajaviła, što «ničoha nie viedaje ab supracoŭnictvie z 1xBet».
Adzin ź fiktyŭnych matčaŭ 1xBet pa baskietbole, jaki ładziŭsia na kijeŭskaj Svoi Arena u vieraśni 2024. Kadr z tranślacyi 1xBet
Hałoŭnymi zasnavalnikami i arhanizatarami nielehalnaj bukmiekierskaj kantory 1xBet źjaŭlajucca rasijanie Dźmitryj Kazoryn, Raman Siemiochin, Siarhiej Karškoŭ. Usie jany rodam z Branska.
Chto staić za nielehalnym bukmiekieram 1xBet? Forbes vypuściŭ svajo rasśledavańnie
Arhanizatary 1xBet (źleva naprava): Dźmitryj Kazoryn, Raman Siemiochin, Siarhiej Karškoŭ
U siaredzinie 2000-ch Siemiochin z partniorami adkryŭ kampjutarny kłub — u padvale ŭ adnym sa spalnych rajonaŭ Branska. Akramia padletkaŭ, prychodzili ludzi starejšyja, jakija zachodzili ŭ internet dla stavak na sport. Časam staŭki pieravyšali dzionnuju vyručku kłuba. Tady Siemiochin zadumaŭ stvaryć sietku kantor pa pryjomie stavak pad kryłom «Fanbiet».
Svoj pieršy punkt jon adkryŭ u Domie kultury miascovaha mašynabudaŭničaha zavoda. Tam ža vystupała kamanda KVZ, kapitanam jakoj byŭ Siarhiej Karškoŭ (u budučyni jon stanie kiraŭnikom upraŭleńnia pa baraćbie z kibierzłačynnaściu).
Kali ŭ 2009 hodzie ŭ Rasii zakryli kazino, nastupiŭ roskvit bukmiekierskich kantor.
Niekalki hadoŭ tamu handlovaja marka 1xBet pierakačavała na kiprski afšor. Rasijskim lehalnym brendam zastałasia «1chstavka».
Rasijskaje śledstva acaniła nielehalny dachod bukmiekieraŭ za pieryjad z 2017 pa 2022 hod u 63 miljardy rasijskich rubloŭ (848 miljonaŭ dalaraŭ). Uładalnikaŭ kantory abviaścili ŭ mižnarodny vyšuk i vydali ordar na ich aryšt.
Da taho momantu branskija miljardery ŭžo atrymali kiprskija pašparty i dahetul siadziać na vostravie.
U kiprskim ofisie bukmiekieraŭ tolki ajcišnikaŭ pracuje 400 čałaviek. Pracentaŭ 80 ź ich — ludzi z Branska. Jość rabotniki i ź Biełarusi. Ajcišnik tam atrymlivaje ad 3500 jeŭra. Plus kampanija buduje damy i razdaje supracoŭnikam biespracentnyja kredyty na kvatery.
Stali viadomyja padrabiaznaści śmierci 35-hadovaha frystajlista Maksima Huścika