Žychary Homielščyny napisali pietycyju da ŭładaŭ z prośbaj abaranić ad BPŁA
Pietycyja «Ab abaronie navučalnych ustanoŭ Chojnickaha rajona ad BPŁA» źjaviłasia na sajcie petitions.by i była nakiravana ŭ Homielski abłvykankam 17 kastryčnika.
20.10.2024 / 10:34
«U suviazi z častymi pralotami bieśpiłotnych latajučych aparataŭ nad terytoryjaj Homielskaj vobłaści prosim nadać uvahu biaśpiecy žycharoŭ Chojnickaha rajona. U pieršuju čarhu havorka idzie pra dziaciej, jakija naviedvajuć dziciačyja sady i škoły», — havorycca ŭ zvarocie.
Aŭtary pietycyi adznačajuć, što niadaŭnija padziei paćviardžajuć pahrozu. Tak, u pačatku vieraśnia 2024 hoda ŭ Homieli adbyłosia padzieńnie źbitaha BPŁA, što pryviało da paškodžańnia budynka na ŭskrainie horada. Choć paciarpiełych nie było, heta padkreślivaje patencyjnuju niebiaśpieku padobnych zdareńniaŭ dla hramadzianskich abjektaŭ, dadajuć aŭtary.
Da taho ž, pryvodziać jany arhumient ad Ministerstva abarony, jakoje zafiksavała niekalki vypadkaŭ parušeńnia pavietranaj prastory krainy z boku zamiežnych bieśpiłotnikaŭ.
«U situacyi, jakaja skłałasia, my asabliva pieražyvajem za našych dziaciej. U našym rajonie dziejničaje kala dvuch dziasiatkaŭ daškolnych i siarednich navučalnych ustanoŭ. Kožny dzień, adpraŭlajučy tudy dziaciej, my nie znachodzim sabie miesca. Ličym, što orhany ŭłady i armija abaviazany zabiaśpiečyć dziejsnuju abaronu svaich hramadzian usimi mahčymymi srodkami. Nastojliva prosim abstalavać navučalnyja ŭstanovy Chojnickaha rajona srodkami radyjoelektronnaj baraćby (REB). Ich možna ŭstalavać na dachach adukacyjnych ustanoŭ», — źviartajucca da ŭładaŭ miascovyja žychary.
Upraŭleńnie pa zvarotach hramadzian Homielskaha abłvykankamy prysłała adkaz, što nakiravała pietycyju ŭ Hałoŭnaje ŭpraŭleńnie adukacyi abłvykankama.
U Kalinkavičach ranicaj uzarvaŭsia «šachied»?
U čatach Kalinkavičaŭ raspaŭsiudžvajecca VIDEA, jakoje zafiksavała padzieńnie bieśpiłotnika
KDB zatrymaŭ žančynu, z doma jakoj było źniata videa padzieńnia šachieda ŭ Kalinkavičach