Kačka, sirop, bliny — recepty straŭ z žuravinami
Žuraviny viadomyja jak asnova dla stvareńnia sokaŭ i morsaŭ, ale taksama ich možna vykarystoŭvać u stravach — jak u sałodkich, tak i ŭ salonych.
20.10.2024 / 10:36
Fota: whiskware.com
Sirop z žuravinaŭ
Spatrebicca:
- 250 h śviežych žuravin
- 2 šklanki (500 mł) vady
- prykładna ½ šklanki (80-100 h) cukru (lepš — karyčnievaha) abo miodu (dadavajcie miod u astyły sirop, kab miod nie straciŭ svaich ułaścivaściaŭ)
- 3 stałovyja łyžki limonnaha soku
Jak rabić:
- Staranna pramyjcie žuraviny i pakładzicie ŭ kastrulu.
- Zatym zalicie jahady vadoj, dadajcie cukar i limonny sok, daviadzicie da kipieńnia i varycie nakrytymi kala 7-10 chvilin, pakul žuraviny nie razvaracca.
- Narešcie pracadzicie ŭsio skroź sita i pieralicie ŭ sterylizavanuju butelku/słoik.
- Hatovy sirop zachoŭvajcie ŭ chaładzilniku. Jaho lepš vykarystać na praciahu tydnia, ale možna i pasteryzavać.
Adzin z varyjantaŭ, jak dadavać u harbatu:
250 mł śviežazavaranaj čornaj harbaty, 2-3 stałovyja łyžki žuravinavaha siropu, 1 pałačka karycy, 1 zoračka anisu. I atrymlivajcie asałodu!
Kačynyja nožki ŭ žuravinnym sousie
Miasa kački moža być ćvierdavatym, ale kali jaho papiarednie zamarynavać, to kačka stanovicca miakkaj i smačnaj. Pastaŭcie miasa marynavacca z ranicy — i ŭviečary možacie hatavać na viačeru.
Spatrebicca:
- 4 kačynyja nožki
- 100 mł aleju
- 200 mł suchoha biełaha vina
- čabor (niekalki halinak)
- łaŭrovaje liście (2-3)
- pierac, razmaryn, hvaździk
Sous:
- 1/2 kh jabłykaŭ
- 1 šklanka žuravin (śviežych ci zamarožanych)
- 200 mł vady
- 2 stałovyja łyžki limonnaha soku
- sol, pierac
Jak hatavać:
- Źmiašajcie alej, vino i śpiecyi. Kačynyja nožki vymyjcie, absušycie i natrycie aliŭkavym marynadam. Nie salicie.
- Adpraŭcie nožki ŭ chaładzilnik marynavacca na 8-10 hadzin. Pramarynavaje kačynaje miasa pasalicie, pakładzicie ŭ pakiet dla zapiakańnia, zalicie marynadam i zapiakajcie ŭ duchoŭcy hadzinu-paŭtary pry tempieratury 180 hradusaŭ. Adkryjcie pakiet i vydalicie tłušč i marynad.
- Zapiakajcie kačku jašče niekalki chvilin, pakul nie ŭtvorycca apietytnaja załacistaja skarynka. Pakul kačka zapiakajecca, pryhatujcie sous.
- Ź jabłykaŭ vyražcie siaredzinu i narežcie ich kavałačkami. Pakładzicie jabłyki i žuraviny ŭ rondal, zalicie vadoj, dadajcie sol, pierac i limonny sok.
- Daviadzicie da kipieńnia, pamienšycie ahoń i varycie, pakul jabłyki i žuraviny nie stanuć miakkija (kala 20 chvilin). Sumieś zdrabnicie błendaram da adnastajnaści.
- Padavajcie kačku z padliŭkaj. Upryhožcie zielaninaj. Hetaje miasa dobra spałučajecca z harodninaj abo rysam.
Bliny z žuravinami i kremam maskarpone
Na bliny:
- 1 šklanka pšaničnaj muki
- 1 šklanka małaka
- 3/4 šklanki vady (naprykład, hazavanaj)
- 2 vialikija jajki
- drobka soli
- 3 stałovyja łyžki aleju abo toplenaha masła
U misku nasypcie muku, dadajcie małako i vadu (hazavanuju ci zvyčajnuju) i pieramiašajcie vienčykam abo miksieram (niadoŭha) da atrymańnia adnastajnaha ciesta biez kamiakoŭ.
Dadajcie jajki, sol i alej abo toplenaje masła i jašče raz niadoŭha pieramiašajcie vienčykam — da adnarodnaj masy.
Razahrejcie patelniu i z dapamohaj apałonika vylicie na jaje nievialikuju porcyju ciesta. Pavaročvajučy patelniu, raźmiarkujcie jaho pa ŭsioj pavierchni patelni.
Kali nižniaja častka blina padpiačecca i dobra zastynie, pieraviarnicie jaho łapatkaj i absmažvajcie ź inšaha boku.
Na žuraviny:
- 1 šklanka žuravin (śviežych abo zamarožanych) 100 h
- 2 stałovyja łyžki tryśniahovaha cukru
- 4 stałovyja łyžki žuravinavaha abo malinavaha soku
U nievialikuju kastrulu z vadoj vysypcie pramytyja žuraviny, dadajcie cukar, nakryjcie i daviadzicie da kipieńnia. Varycie na pavolnym ahni kala 2 chvilin, pakul bolšaja častka žuravin nie treśnie.
Dadajcie sok i varycie jašče 1—2 chviliny. Prymicie z ahniu, pry nieabchodnaści dadajcie bolš cukru.
Na krem z maskarpone:
- 3 jaječnyja žaŭtki
- 5 stałovych łyžak cukrovaj pudry
- 200 h syru maskarpone
- 200 mł viarškoŭ 30%
- 1 stałovaja łyžka limonnaha soku
Jak usio abjadnać:
Padsmažcie bliny i zvarycie žuraviny. Pryhatujcie krem: žaŭtki ŭźbicie z cukrovaj pudraj dabiała, dadajcie syr maskarpone i ŭsio pieramiašajcie. Narešcie, dadajcie ŭźbityja hustyja viarški i limonny sok i akuratna pieramiašajcie ŭsio łyžkaj. Krem zachoŭvajecie ŭ chaładzilniku, pakul nie budziecie vykładvać jaho na bliny.
Na kožny blin namažcie prykładna 2-3 stałovyja łyžki kremu i 1 stałovuju łyžku žuravinnaha sousu, składzicie blincy trochkutnikami i padavajcie.
Žuraviny sapraŭdy dapamahajuć pry infiekcyjach, ale nie ŭsim
Žuraviny ŭ cukry, hryljaž i zhuščonka. Biełaruska adšukała ajčynnyja pradukty na varšaŭskim rynku
10 najlepšych naturalnych antybijotykaŭ: što heta za raśliny i jak jany dziejničajuć?