ZŠA abviaścili ŭznaharodu da 10 miljonaŭ dalaraŭ za infarmacyju pra rasijski telehram-kanał «Rybaŕ»
Rasijski prajekt «Rybaŕ» u ZŠA abvinavačvajuć va ŭmiašańni ŭ amierykanskija vybary, tamu na sajcie prahramy «Uznaharodžańnie za dapamohu pravasudździa» Dziarždepartamienta ZŠA abviaścili vialikuju ŭznaharodu za infarmacyju pra hety kanał i jaho redaktaraŭ dy supracoŭnikaŭ.
18.10.2024 / 20:49
Suzasnavalnik i hienieralny dyrektar «Rybaria» Michaił Źvinčuk. Fota: Maksim Kardapolcaŭ / RTVI
U paviedamleńni śćviardžajecca, što «Rybaŕ» — heta rasijskaja miedyjaarhanizacyja, jakuju raniej finansavaŭ Jaŭhien Pryhožyn. Ciapier jaje nibyta finansuje «Rastech». Za infarmacyju pra hetuju arhanizacyju amierykancy hatovyja zapłacić vialikija hrošy — da 10 miljonaŭ dalaraŭ.
Pavodle viersii ŭładaŭ ZŠA, «Rybaŕ» prasoŭvaje «prarasijskija i antyzachodnija ideałahičnyja ŭstanoŭki», «kirujučy prapahandysckimi miedyja-kanałami» i tvitar-akaŭntami. Jaho taksama abvinavačvajuć u tym, što jon sprabavaŭ «pasiejać razład, spryjaŭ sacyjalnym roznahałośsiam, raspalvaŭ mižpartyjnuju i rasavuju varožaść, zaklikaŭ da nianaviści i hvałtu ŭ Złučanych Štatach».
Ułady ZŠA cikavić infarmacyja pra dzieviać čałaviek z kamandy «Rybaria». U pryvatnaści, heta dyrektar prajekta Michaił Źvinčuk.
Prajekt «Rybaŕ» isnuje niekalki hadoŭ. Na sajcie prajekta skazana, što jon isnuje nibyta na narodnyja achviaravańni i zajmajecca «pytańniami vajskovaj analityki, infarmacyjnaj vajny i vizualnaj prapahandy».
U sakaviku 2023 hoda było zasnavana TAA «Rybaŕ». Jaho hienieralnym dyrektaram i suzasnavalnikam źjaŭlajecca Michaił Źvinčuk, a Valeryja Źvinčuk — druhim z troch suzasnavalnikaŭ.
Pradstaŭnik Dziarždepa ZŠA naviedaŭ Minsk i abmierkavaŭ vyzvaleńnie palitviaźniaŭ
Žurnalist: Tramp, pakinuŭšy Bieły dom, razmaŭlaŭ niekalki razoŭ z Pucinym