U Hiermanii zhareła pažarnaja častka, jakuju adkryli ŭ studzieni. U joj nie było pažarnaj sihnalizacyi
Častku ŭ Hiesenie nazyvali ultrasučasnaj, ale jana nie prapracavała i hoda.
17.10.2024 / 16:01
Skrynšot videa hessenschau.de
U niamieckim Štadtalendorfie ŭ Hiesenie zhareła pažarnaja častka, jakuju adkryli ŭ studzieni 2024 hoda.
Častku nazyvali ultrasučasnaj i inavacyjnaj. Na terytoryi była abstalavanaja vieža dla trenirovak vyšynioj u 23 mietry, trenažornaja zała, pralnia i śpiecyjalnaja sistema dohladu za šłanhami.
Adnak pažarnaj sihnalizacyi i raspyrskvalnikaŭ u častcy nie było — na hetym vyrašyli aščadzić, pakolki zakon nie abaviazvaje ŭstaloŭvać hetyja darahija sistemy na takich abjektach, piša hessenschau.de.
Pryčynaj pažaru, miarkujučy pa ŭsim, stała ŭzharańnie aŭtamabila ŭ haražy ź instrumientami. Pažarniki byli na miescy ŭžo praz try chviliny, jany zmahli dastać amunicyju i prystupili da tušeńnia. Adnak ahoń raspaŭsiudziŭsia vielmi chutka i praktyčna źniščyŭ častku.
Połymia padymałasia na vyšyniu ad 10 da 15 mietraŭ ad dachu aparatnaj zały. Unutry zhareła amal dziasiatak pažarnych mašyn. Nichto ź ludziej, pavodle źviestak uładaŭ, nie paciarpieŭ. Ahulnaja škoda skłała da 24 młn jeŭra.
Zdareńnie ŭžo nazvali vialikim fijaska pažarnaj častki. Pry hetym ekśpierty nie ŭpeŭnienyja, što pažarnaja sihnalizacyja i raspyrskvalniki dapamahli b u hetaj situacyi.
Paśla incydentu ŭ Štadtalendorfie mer susiedniaha municypaliteta paabiacaŭ pastavić pažarnyja sihnalizacyi na pažarnaj častcy, jakaja budujecca ŭ horadzie.
Dačka padpaliła firanku: padrabiaznaści trahiedyi ŭ Sienicy, dzie zahinuli dvoje dzietak