Były ŭdzielnik One Direction zahinuŭ, zvaliŭšysia z treciaha paviercha hatela ŭ Arhiencinie
Brytanski śpiavak i były ŭdzielnik pop-hurta One Direction Liam Pejn byŭ znojdzieny miortvym u Arhiencinie, paviedamili miascovyja ŭłady. Pavodle palicyi, 31-hadovy muzyka vypaŭ z treciaha paviercha hatela Casa Sur u Buenas-Ajresie, piša Bi-bi-si.
17.10.2024 / 07:09
Wikimedia Commons
Na miesca zdareńnia prybyli ekstranyja słužby, ale na toj momant Pejn, znojdzieny ŭ dvary haścinicy, užo pamior.
«Liam Džejms Pejn, kampazitar i hitaryst, były ŭdzielnik hurta One Direction, zahinuŭ siońnia paśla padzieńnia z treciaha paviercha hatela ŭ rajonie Palerma», — havorycca ŭ zajavie palicyi.
Paviedamlajecca, što da hetaha ŭ palicyju pastupiła paviedamleńnie pra «ahresiŭnyja pavodziny mužčyny, mierkavana, jaki znachodziŭsia pad uździejańniem narkotykaŭ ci ałkaholu».
Kiraŭnik haradskoj słužby chutkaj miedycynskaj dapamohi SAME Albierta Kresenci paviedamiŭ miascovamu telebačańniu, što ŭ vyniku padzieńnia śpiavak atrymaŭ «vielmi ciažkija traŭmy, niesumiaščalnyja z žyćciom».
U stalicu Arhienciny Pejn prylacieŭ na kancert inšaha byłoha ŭdzielnika One Direction Najła Chorana. Ułady Arhienciny pačali rasśledavańnie i vyśviatlajuć pryčyny zdareńnia.
«My padtrymlivajem kantakt ź miascovymi ŭładami ŭ suviazi sa spravazdačami ab śmierci brytanskaha hramadzianina ŭ Arhiencinie», — havorycca ŭ paviedamleńni Foryn-ofisa.
Liam Pejn, jaki naradziŭsia 29 žniŭnia 1993 hoda, dvojčy byŭ udzielnikam brytanskaha televizijnaha šou X Factor — u 2008 i 2010 hadach. U pieršy raz sudździa i muzyčny pradziusar Sajman Koŭełł paraiŭ jamu spačatku skončyć škołu, a zatym znoŭ vystupić na konkursie. U 2010 hodzie jon viarnuŭsia na X Factor i vykanaŭ pieśniu Cry Me a River Džaścina Cimbierłejka, čym uraziŭ usich sudździaŭ. Paśla hetaha jon dałučyŭsia da inšych kankursantaŭ — Najła Chorana, Zejna Malika, Hary Stajłza i Łui Tomlinsana, i jany razam stvaryli hurt One Direction.
Hurt nie vyjhraŭ X Factor, ale staŭ adnym z samych paśpiachovych u historyi pop-muzyki i pradaŭ bolš za 70 miljonaŭ albomaŭ pa ŭsim śviecie. U 2016 hodzie hurt spyniŭ vystupleńni, paśla čaho Pejn i inšyja ŭdzielniki zanialisia solnymi prajektami.
«Liam byŭ klučavym udzielnikam hurta. Jon dapamahaŭ pisać šmat piesień, i, viadoma, paśla raspadu One Direction u jaho była vielmi paśpiachovaja solnaja karjera», — adznačaje muzyčny ahladalnik BBC Mark Sevidž.
U 2017 hodzie debiutny solny sinhł Pejna Strip That Down zaniaŭ treciaje miesca ŭ brytanskim čarcie, a jaho sumiesnaja praca z Rytaj Oraj For You, jakaja stała saŭndtrekam da filma Piaćdziasiat adcieńniaŭ svabody, uvajšła ŭ top-10. Liam Pejn niekatory čas znachodziŭsia ŭ šlubie z papularnaj brytanskaj śpiavačkaj i byłoj udzielnicaj hurta Girls Aloud Šerył Kouł, jakaja ŭ 2017 hodzie naradziła ad jaho syna.