«Za kampanii ź Biełarusi dajuć nizkija multyplikatary». Jak IT sutyknulisia z dylemaj
U intervju DzClub hiendyrektar i zasnavalnik Zubr Capital Aleh Chusajenaŭ apisaŭ pierśpiektyvy i ryzyki dla biełaruskich IT-kampanij ciapier.
15.10.2024 / 16:44
Aleh Chusajenaŭ. Fota: devby.io.
Zubr Capital — inviestycyjnaja kampanija z bolš čym 30-hadovym dośviedam. U ciapierašni čas Zubr Capital kiruje tryma fondami z ahulnym abjomam bolš za $250 młn, nadajučy asablivuju ŭvahu IT i technałahičnym siektaram.
Aleh Chusajenaŭ raskazaŭ, što jany ciapier inviestujuć u IT-kampanii, jakija rełakujucca z uschodu na zachad.
«U historyi byŭ pieryjad Vialikaha pierasialeńnia narodaŭ, a my ciapier nazirajem Vialikaje pierasialeńnie ajcišnikaŭ — z Rasii, Kazachstana, Biełarusi, Ukrainy.
My vyznačyli dla siabie łakacyi, dzie «adłoŭlivać» hety patok u svaje sietki — heta Kipr, tam vielmi šmat ajcišnaha varušniaku, i Polšča. Tut jość nie tolki biełaruskija ajcišniki, ale i ŭkrainskija, na jakich my taksama hladzim».
Rełakacyju jon prapanuje razhladać jak mahčymaść dla IT.
«Epidemija kavidu pryviała nas da taho, što ździełki stali ździajśniać, nie sustrakajučysia, — prosta ŭ Zoom. Kali zdaryŭsia žnivień 2020 hoda ŭ Biełarusi, ja zrazumieŭ, što mnie nie abaviazkova viartacca ŭ Minsk, — maje kalehi nie asudziać mianie za heta. A paśla lutaha 2022 hoda vielizarnaja kolkaść ajcišnikaŭ źniałasia sa svaich miescaŭ i pajechała za miažu — i my akazalisia da hetaha hatovyja.
Za kampanii ź Biełarusi dajuć nizkija multyplikatary. U nas jość vielmi talenavityja chłopcy, jakija stvarali biznesy a-la Amazon, — dyk voś kali b jany adkryli svaje kampanii ŭ maleńkaj Litvie, tyja b kaštavali bolš za miljard adrazu ž. Tamu kali vam paščaściła pakinuć Biełaruś, — heta značyć, što multyplikatary na vaš biznes buduć vyšejšyja».
Inviestar razvažaje, čamu ciapier biełaruskija IT-kampanii časam chavajuć svaje biełaruskija karani.
«Ja skažu tak: u kułuarach nichto z hetych chłopcaŭ nie saromiejecca taho, što jany biełarusy — jany z honaram pra heta havorać. U biełaruskaha IT dobry šlejf i imidž.
U publičnym ža poli pra heta nie havorać pa niekalkich pryčynach: niekalki miesiacaŭ tamu kiprski bank, z členami praŭleńnia jakoha ja družny, paviedamiŭ: «Aleh, my ciabie lubim i pavažajem, ale my viedajem, što ty źviazany ź Biełaruśsiu. My vymušanyja zakryć tvaje rachunki — pakolki sankcyi i inšaje». Viadoma, jany dali mnie čas, kab uładzić spravy, i my pa-raniejšamu siabrujem, ale voś jość takoje — u niekatorych rečach biełaruskija pašparty taksičnyja.
I kali vy chočacie, kab na biržy vas kupiła vielizarnaja kolkaść amierykancaŭ, vam varta hetuju infarmacyju trymać u cieni — prosta nie vyłučać».
«Naša z vami zadača — usiudy stać svaimi. Vy pryjechali siudy ŭ Polšču — vy pavinny tut stać svaimi. Na Kipr prybyli — toje ž samaje. A ŭžo jak dapamahčy svajoj radzimie, potym my prydumajem. Kali my budziem mocnymi, bahatymi i ščaślivymi, to dapamahčy radzimie zmožam», — dadaŭ Chusajenaŭ.
Zasnavalnik Zubr Capital raskazaŭ, čym «karotkaja» adukacyja lepšaja za «doŭhuju»