Sud nad Palinaj Šarendaj-Panasiuk pieranieśli na siońnia
Jaje treci raz pačali sudzić nibyta za złosnaje niepadparadkavańnie administracyi kałonii.
15.10.2024 / 09:54
Pradstaŭniki dypłamatyčnaha korpusa ES pryjechali ŭ Rečycki rajonny sud, kab padtrymać palitźniavolenuju. Jaje treci raz pačali sudzić nibyta za złosnaje niepadparadkavańnie administracyi kałonii, nahadvaje Radyjo Racyja.
Ale dypłamataŭ i maci Paliny nie puścili ŭ zału suda pa pryčynie adsutnaści miescaŭ, kaža muž Paliny — Andrej Šarenda:
«Na Palinu praciahvajecca kałasalny psichałahičny cisk, bo mała taho, što jana zahnanaja ŭ taki strašenny humanitarny momant, zaraz utrymlivajecca ŭ IČU, dzie faktyčna ad choładu jana nie moža spać. Bo ŭ sudzie było bačna, što jana vielmi kiepska vyhladaje. I fizična było bačna, što jana stomlenaja, vielmi blakły tvar, siniaki pad vačyma. Bačna, što jana nie spała niekalki sutak. Vielmi ciažka, kali voś taki psichałahičny cisk idzie, kali nie puskajuć nikoha na sud, kali jana bačyć usich łukašystaŭ, jakija śmiajucca ź jaje».
Palina vykazała niedavier sudu. Admoviła BT u zdymcy. Sudzić minułahodni Stanisłaŭ Ivaniucienka. Maci pačała skandalić, jaje puścili ŭ sudovuju zału. Palina pastaviła ŭmovu, što admovicca ad sudovaha ŭdziełu, kali nie puściać tych, chto pryjechaŭ da jaje na sud. U vyniku Palinu advieźli ŭ Homielski abłasny psichijatryčny špital, adkul praz hadzinu pryvieźli nazad. Sud pieraniesieny na siońnia na 14.30.
U Rečycy raspačynajecca čarhovy sud nad Palinaj Šarendaj-Panasiuk
Pasły ES pryjšli da budynka suda ŭ Rečycy, dzie zasłuchoŭvajecca sprava Paliny Šarendy-Panasiuk