Kolišniamu načalniku adździeła Bankaŭskaha pracesinhavaha centra pahražaje da vaśmi hadoŭ kałonii za danaty i kamientary ŭ Telegram
Admietna, što Andrej Łabada vydaliŭ telehram-akaŭnt za 9 miesiacaŭ da zatrymańnia. Nieŭzabavie jaho pačynajuć sudzić.
15.10.2024 / 08:42
Andrej Łabada. Archiŭnaje fota ź jahonaj staronki ŭ «Adnakłaśnikach»
Andreju Łabadzie 54 hady. Jon minčuk, skončyŭ Biełaruski dziaržaŭny ŭniviersitet infarmatyki i radyjoelektroniki (tady — Minski radyjotechničny instytut) u 1993 hodzie. Ad taho času pracavaŭ u bankaŭskaj śfiery.
Viadoma, što pieršym miescam pracy staŭ Biełarusbank, paźniej jon pierajšoŭ u Bankaŭski pracesinhavy centr. Tam jon daros da načalnika adnaho z adździełaŭ.
Andreja zatrymali ŭ krasaviku 2024 hoda. 12 krasavika jamu prysudzili administracyjny aryšt za «raspaŭsiud ekstremisckich materyjałaŭ». Paśla hetaha suprać jaho zaviali kryminalnuju spravu. U videa HUBAZiK jon kaža, što zrabiŭ danat u fond «Kraina dla žyćcia» i pisaŭ kamientary.
Admietna, što akaŭnt Andreja byŭ paraŭnalna dobra abaronieny — imia karystalnika było vypadkovym, telefon nie «prabivajecca» rasijskimi botami. Adnak, jon pisaŭ u roznych łakalnych čatach davoli šmat padrabiaznaściaŭ pra siabie (adras pražyvańnia jaho i svajakoŭ, źviestki pra miesca pracy) i skidvaŭ fota. Da taho ž, akaŭnt mužčyny byŭ stvorany ažno ŭ 2017 hodzie, kali isnavała techničnaja mahčymaść pierabirać akaŭnty pa numarach.
Niezrazumieła, jak mienavita na jaho vyjšła, ale zdeananimizavać jahony akaŭnt było nie vielmi składana technična.
Sud nad Andrejem Łabadoj pačynajecca 31 kastryčnika ŭ Minskim haradskim sudzie. Jaho abvinavačvajuć u «abrazie pradstaŭnika ŭłady» (art. 369 KK) i «finansavańni ekstremisckaj dziejnaści» (č. 1 i 2 art. 361-2 KK). Andreju pahražaje da vaśmi hadoŭ kałonii.
Sudzić jaho budzie sudździa Alaksandr Rudenka. Jon adpraviŭ za kraty niekalki dziasiatkaŭ biełarusaŭ pa palityčnych spravach.
Ja vydaliŭ Telegram-akaŭnt. Ja ŭ biaśpiecy?