У Мінску спынілі таварыскі футбольны матч з-за масавай бойкі паміж гульцамі
Гульню паміж футбольнымі клубамі «Мінск» і «Маладзечна-2018», якая сёння праходзіла ў сталіцы, не дала скончыць бойка ў другім тайме.
13.10.2024 / 19:14
Пра гэта паведамляе выданне «Беларускі футбол».
Гульцы ФК «Маладзечна». Ілюстрацыйнае фота. Фота: ФК «Маладзечна» / vk.com
«Матч спынены з-за масавай бойкі на полі», — паведамілі ў тэлеграм-канале «Маладзечна-2018». Пазней гэты допіс быў выдалены, і клуб назваў іншую прычыну спынення гульні: «па ўзаемнай згодзе каманд».
Паядынак завяршыўся з лікам 1:0 на карысць сталічнага клуба.
Пра факт канфлікту паміж гульцамі згадваюць гледачы, якія каментавалі гэтую навіну на розных пляцоўках.
«Быў на матчы, зляцеліся там практычна ўсе маментальна. Фол быў на кімсьці, і потым пачалася бойка», — напісаў адзін з падпісчыкаў канала.
«А на полі былі прафесійныя гульцы і прычым футбалісты. Так рабіць нельга. І ладзіць разборку, пускаючы ў ход кулакі, вельмі сумнеўна», — напісаў іншы.