Kola Łukašenka hastraluje pa krainie
U subotu syn palityka znoŭ vystupiŭ na kancercie — užo ŭ Maładziečnie.
13.10.2024 / 08:10
Mikałaj Łukašenka vystupiŭ u Maładziečnie. Tochka.by
17 vieraśnia ŭłady zapuścili svoj «marafon adzinstva». Pa sutnaści, heta sieryja pieradvybarnych kancertaŭ i inšych mierapryjemstvaŭ u padtrymku Alaksandra Łukašenki i toj palityki, jakuju jon pravodzić (choć sama data vybaraŭ jašče nie abvieščana).
Adkaznaj za marafon pastavili niaviestku palityka Hannu Łukašenka (jakaja piša pieśni pad psieŭdanimam Hanna Siałuk).
Takija mierapryjemstvy projduć u roznych rehijonach. Pieršym horadam paśla Minska, kudy adpravilisia prapahandysty i praŭładnyja artysty z hastrolami ŭ ramkach hetaha marafona, staŭ Maładziečna.
U Minsku na kancercie da tak «Dnia narodnaha adzinstva» siarod artystaŭ vystupaŭ Mikałaj Łukašenka — jon syhraŭ na rajali. Za druhim rajalem siadzieła vykładčyca kafiedry śpiecyjalnaha fartepijana Biełaruskaj dziaržaŭnaj akademii muzyki Alena Astaškina-Myśliŭčyk.
Akazałasia, što i ŭ rehijonach syn palityka budzie na scenie. Prynamsi ŭ Maładziečnie jon iznoŭ byŭ za rajalem.
Aproč Koli Łukašenki, da haradžan pryjechała kaśmičnaja turystka Maryna Vasileŭskaja, śpiavak Alaksandr Saładucha, vykanaŭcy «Bałady ab dyktataru». A horadu padaryli ŭra-patryjatyčny murał ad BRSM.
Murał, adkryty ŭ Maładziečnie. Fota: sb.by